Minitraktorlarni olib kirishda bojxona imtiyozlari beriladi

Bu imtiyozlar aholi xonadonlarida sanoat usulida mahsulot ishlab chiqarishni qo‘llab-quvvatlashga qaratilgan.

2027 yil 1 yanvargacha motokultivator, bir o‘qli traktor va minitraktorni olib kirishda bojxona bojining nol stavkalari belgilanadi. Bu haqda «Aholi xonadonlarida sanoat usulida mahsulot ishlab chiqarishni qo‘llab-quvvatlash hamda tomorqa va dehqon xo‘jaliklarida yangi zaxiralarni ishga solishga doir chora-tadbirlar to‘g‘risida»gi prezident qarorida belgilab qo‘yilgan.

Shuningdek, qarorga ko‘ra, «Online-mahalla» platformasining «Aholi tomorqasi» moduliga tomorqa yer egalari tomonidan yetishtirilayotgan qishloq xo‘jaligi mahsulotlari, xonadonda mavjud issiqxonalar hamda tomorqadan samarali foydalanish to‘g‘risidagi ma’lumotlar har 6 oyda (aprel, oktyabr oylarida) kiritiladi.

Fermer, dehqon xo‘jaliklari va tomorqa yer egalarini qo‘llab-quvvatlash jamg‘armasining resurslari hisobidan ajratiladigan kreditlar yillik Markaziy bankning asosiy stavkasidan 4 foizlik punkt yuqori stavkada (shundan 4 foizi bank marjasi) quyidagicha beriladi:

- chorvachilik (qoramol, qo‘y, echki), baliqchilik, quyonchilik, asalarichilik, kurkachilik va parrandachilik, biogumus ishlab chiqarish va «dala do‘konlari»ni qurish uchun – 1 yilgacha imtiyozli davr bilan 3 yil muddatga;

- bog‘dorchilik (ko‘chatchilik), uzumchilik (tok so‘risi) va limonchilikni tashkil etish, issiqxona qurish, qishloq xo‘jaligi texnikasi va asbob-uskunalarini xarid qilish hamda ularni joylashtirish uchun bino va inshootlar qurish, ko‘chma muzlatkichlarni o‘rnatish, artezian quduqlarini qazish uchun – 3 yilgacha imtiyozli davr bilan 7 yilgacha muddatga.

#imtiyoz #Qishloq xo‘jaligi