O‘zbekiston va Tojikiston sayyohlik yo‘nalishida hududlararo hamkorlikni kengaytiradi

O‘zbekiston elchixonasi ko‘magida Surxondaryo viloyati Turizm boshqarmasi rahbariyati va sayyohlik kompaniyalar vakillarining Tojikiston Xatlon viloyatida bo‘lib o‘tgan xalqaro sayyohlik ko‘rgazmasida ishtiroki tashkil etildi.

Foto: Dunyo

"Dunyo" xabariga ko‘ra, ko‘rgazma doirasida O‘zbekiston va Tojikiston sayyohlik kompaniyalari vakillari o‘rtasida B2B shaklidagi muzokaralar tashkil etildi. Uchrashuvlar natijasida ikki mamlakat sayyohlik firmalari o‘zaro hamkorlik aloqalarini yo‘lga qo‘yish bo‘yicha bir qator bitimlarni imzoladi.

Surxondaryo viloyati delegatsiyasi tashrif davomida, shuningdek, Tojikistonning "Safed dara" qishki kurort zonasida bo‘lib, hududda amalga oshirilgan ishlar va mijozlarga yaratilgan qulayliklar bilan tanishdi.