XOQ: Parijdagi Olimpiadada 40 ga yaqin rossiyalik qatnasha oladi

Parijdagi yozgi Olimpiada o‘yinlarida 40 ga yaqin rossiyalik sportchi neytral maqomda ishtirok etishi mumkinligi haqidagi xabarlar haqiqatga yaqin bo‘lishi mumkin. Bunday bahoni Xalqaro olimpiya qo‘mitasi (XOQ) vitse-prezidenti Jon Kouts bildirdi, deb yozadi 17 mart, yakshanba kuni Reuters.

Shu bilan birga, Kouts bu masala bo‘yicha aniq ma’lumotlarni bilmasligini ta’kidladi. 2022 yil fevralida Rossiya tomonidan Ukrainaga qarshi boshlangan urush tufayli XOQ rossiyalik va belaruslik sportchilarning Olimpiadadagi ishtirokini sezilarli darajada chekladi. 

Rossiyalik sportchilar uchun cheklovlar 

XOQning 2023 yil dekabr oyida qabul qilingan qaroriga ko‘ra, Rossiya Federatsiyasi va Belarusning urushni qo‘llab-quvvatlayotgani taxmin qilinayotgan sportchilari o‘z mamlakatlari milliy bayroqlarisiz, faqat individual yo‘nalishlar bo‘yicha musobaqalarda qatnashishi mumkin. Ukrainaga qarshi urushni faol qo‘llab-quvvatlagan yoki Rossiya yoki Belarus qurolli kuchlari yoki milliy xavfsizlik tashkilotlari bilan bog‘liq bo‘lgan sportchilar o‘yinlarda qatnasha olmaydi. 

Ukraina tashqi ishlar vaziri Dmitriy Kuleba XOQning rossiyalik sportchilarga Olimpiadada ishtirok etishiga ruxsat berish qarorini keskin tanqid qilib, buni «uyat» deb atadi. Ayni paytda Parij meri Ann Idalgo mart oyi boshida rossiyalik va belaruslik sportchilar o‘yinlarga kelmasligiga umid bildirdi. Fransiya poytaxti uchinchi bor yozgi Olimpiya o‘yinlariga mezbonlik qiladi. 

ROQ rossiyaliklarning Olimpiadada ishtirok etish shartlari to‘g‘risida 

Rossiya Olimpiya qo‘mitasi (ROQ) rossiyaliklarning Parijdagi o‘yinlarda ishtirok etishi uchun qo‘yilgan shartlarni «adolatsiz» deb atadi, biroq ROQ «boykot yo‘liga o‘tmasligini» ta’kidladi. 

«ROQ hech qachon Olimpiada o‘yinlarini boykot qilgani yo‘q, biz ROQ sifatida hech qachon boykot yo‘lidan bormaymiz. Har doim rossiyalik olimpiyachilarning ushbu musobaqalarda ishtirok etishini qo‘llab-quvvatlaymiz, lekin faqat kamsitmasdan, teng shartlar asosida. Afsuski, Parij-2024 rossiyalik olimpiyachilarni teng sharoit bilan ta’minlay olmaydi, shu munosabat bilan savol tug‘iladi - nega rossiyalik sportchilar uchun bunday adolatsiz sharoitlar?» - dedi 14 mart kuni ROQ prezidenti Stanislav Pozdnyakov. 

Shu bilan birga, 23 fevral kuni ROQ o‘zining Telegram-kanalida sportchilarning XOQ tomonidan joriy etilgan betaraflikka rioya qilish amaldagi mezonlariga rozilik berishi «Rossiya qonunchiligi buzilishiga olib kelishi mumkinligi» haqida ogohlantirdi. 

«Tegishli komissiyalar va ROQ apparati mavjud sharoitlarni sinchkovlik bilan tahlil qilib, bunday rozilikning mumkin bo‘lgan huquqiy va boshqa salbiy oqibatlari to‘g‘risida Butunrossiya sport federatsiyalarini xabardor qilish uchun keng qamrovli choralar ko‘rmoqda», deya ma’lum qildi tashkilot.