Sevastopol o‘qqa tutildi. Ukraina ikkita harbiy kemaga zarba berilganini ma’lum qilgan

Shahar gubernatori Mixail Razvojayev bu hujumni «so‘nggi vaqtlardagi eng keng ko‘lamlisi» deb atagan.

24 martga o‘tar kechasi Ukraina qurolli kuchlari anneksiya qilingan Sevastopolga yopirilma hujum qildi.

Shaharning Rossiya tomonidan tayinlangan gubernatori Mixail Razvojayev zarbani «so‘nggi vaqtlardagi eng keng ko‘lamlisi» deb atagan. Uning ma’lumotiga ko‘ra, raketa parchalari turar joy binosiga tushishi oqibatida 65 yoshli kishi halok bo‘lgan, yana to‘rt kishi jarohatlangan.

Shahar bo‘ylab qancha raketa uchirilgani ma’lum emas. Razvojayevning versiyasiga ko‘ra, havo hujumidan mudofaa kuchlari «10 dan ortiq raketani to‘xtatgan». Telegram-kanallarda 30 tagacha raketa uchirilgani haqida aytilgan.

Ukraina tomoniga ko‘ra «Yamal» va «Azov» yirik desant kemalari aniq nishonga olingan, shuningdek Rossiya Qora dengiz floti aloqa markaziga zarba berilgan.

Ukraina qurolli kuchlari Havo kuchlari qo‘mondoni Mikola Oleshchuk uchuvchilar va dengizchilarga «muvaffaqiyatli jangovar ish» uchun minnatdorchilik bildirib post qo‘ygan, shuningdek shunday yozgan: «Qrim — bizniki!».

RF mudofaa vazirligi kemalar shikastlangani yuzasidan izoh bermagan.

Tayyorlagan: Азиз Қаршиев

#raketa zarbasi #Sevastopol