Qrimda benzin sotish to‘xtatildi

Qrimda barcha yoqilg‘i quyish shoxobchalarida yoqilg‘i berish to‘liq to‘xtatildi, deb e’lon qildi yarimorolning Rossiya tomonidan tayinlangan rahbari Sergey Aksenov.

Benzin sotuvi 21 iyun kuni soat 9 dan boshlab to‘xtagan. «Yoqilg‘i faqat Qrim respublikasidagi hayot va xavfsizlikni ta’minlaydigan davlat xizmatlari uchungina beriladi, – degan Aksenov.

Qrimda benzin taqchilligi may oyidayoq boshlangandi, bunga Ukraina qurolli kuchlari Rossiyaning asosiy hududidan yarimorolga olib boruvchi «Novorossiya» trassasi orqali harakat qiluvchi benzin tashuvchi mashinalar va boshqa yuk avtomobillariga muntazam ravishda dronlar bilan hujum qilishni boshlagani sabab bo‘lgandi.

Shundan keyin hukumat benzinni talon asosida sotishni yo‘lga qo‘ygan va bir kishiga bir kunda 20 litrdan ortiq benzin sotilishi taqiqlangandi. Keyinroq cheklovlar yanada kuchaytirildi va benzin uchun talon olish ham qiyinlashdi, bunday talonni endi bir haftada bir marta qo‘lga kiritish mumkin edi. 

Benzin sotishni butunlay to‘xtatish haqidagi qaror Qrim hududi bo‘ylab navbatdagi hujumlar fonida qabul qilindi. Rasmiylarga ko‘ra, so‘nggi hujumlar oqibatida 14 kishi jarohatlanib, shifoxonaga yotqizilgan.  Ijtimoiy tarmoqlarda «Novorossiya» trassasiga hujumlar davom etayotgani aks etgan videolar paydo bo‘lgan, ulardan birida yo‘lda ketayotgan benzovoz Hornet rusumli dron zarbasidan bazo‘r qochib qutulganini ko‘rish mumkin.