Dniproda Rossiya raketasi sport kolleji binosini shikastladi. Tataristonda dron yotoqxonaga urildi. Urush suratlari

Ukrainada urushning 769-kuni o‘tdi. Asosiy ma’lumotlar:

Tataristonda dronlar Yelabuga va Nijnekamskdagi korxonalarga hujum uyushtirdi. Jabrlanganlar bor.
«RBK-Ukraina» Tataristonga dronlar hujumi — Ukraina harbiy razvedkasi amaliyoti ekanini ma’lum qilgan.
RF qo‘shini Ukrainaning Dnipropetrovsk va Kirovograd oblastlariga kamikadze dronlar va X-59 raketalari bilan hujum uyushtirdi.
Pyotr Verzilov Rossiya armiyasi to‘g‘risidagi «feyk» ishi bo‘yicha sakkiz yilu to‘rt oy muddatga ozodlikdan mahrum etildi.
Rossiyada urush boshidan buyon harbiy komissariatlarga o‘t qo‘yish va temiryo‘llarda diversiya uyushtirishda gumonlangan qariyb 440 kishi «aniqlangan».
Zelenskiy safarbarlik yoshini 27 dan 25 yoshga tushirish to‘g‘risidagi farmonini imzoladi.
Rossiya qo‘shini Dnipro bo‘ylab raketa zarbasi yo‘lladi. 18 kishi jarohatlangan.

Tataristonga dronlar hujumi

Rossiya va Ukraina o‘rtasidagi keng ko‘lamli urush boshidan buyon ilk bor Tataristonning ikki hududida — Yelabuga va Nijnekamskda dronlar hujumi kuzatildi. Bu shaharlar Ukraina bilan chegaradan 1300 kilometr masofada joylashgan. Yelabugada «Alabuga Politex» kolleji yotoqxonasi shikastlangan. Tatariston rasmiylariga ko‘ra, 14 kishi jarohat olgan, ular orasida Qirg‘iziston, Shri-Lanka, Zimbabve, Ruanda, Kongo, Keniya, Nigeriya va Janubiy Sudan fuqarolari bor. Xabarlarga ko‘ra, yotoqxona Rossiya Ukrainaga hujum qilishda foydalanayotgan Shahed tipidagi dronlar yig‘iladigan zavoddan bir necha yuz metr masofada joylashgan. Nijnekamskda dronlar «Taneko» neftni qayta ishlash zavodi hududiga uchib kelgan — bu «Tatneft» kompaniyasi tarkibidagi korxona hisoblanadi. «RBK-Ukraina» manbalari Tataristondagi korxonalarga dronlar hujumi — Ukraina mudofaa vazirligi Bosh razvedka boshqarmasi (GUR) amaliyoti ekanini xabar qilgan.

«Alabuga Politex» kolleji talabalari yashagan yotoqxona
Ostorojno, novosti

Nijnekamskdagi «Taneko» neftni qayta ishlash zavodida dronlar hujumidan keyin chiqqan yong‘in
Baza

Chasiv Yar yaqinidagi ukrain kuchlari

Rossiya qo‘shini Donetsk oblastidagi Chasiv Yar shahriga hujum qilishga urinmoqda, ammo shaharga yaqinlashib kelishdan oldin ular ukrainlarning Bogdanovka qishlog‘idagi mudofaa chizig‘idan o‘tishi talab etiladi. Mart oyi oxiri holatiga ko‘ra, ular Bogdanovka qishlog‘ining sharqiy qismini egallagan, ammo g‘arbiy qismida ukrain harbiylari mudofaani ushlab turibdi.

Chasiv Yar yaqinida ukrainalik harbiylar Britaniyaning FV103 Spartan zirhli transportyorida ketmoqda
Roman Pilipey / AFP / Scanpix / LETA

Frontning ushbu uchastkasida boshqalari qatorida 5-alohida shturm brigadasi jangchilari ham jang qilmoqda. Bu bo‘linma Baxmut mudofaasida, shuningdek Lisichansk va Vuhlegorsk uchun janglarda ham qatnashgan.
Roman Pilipey / AFP / Scanpix / LETA

Ukraina qurolli kuchlari jangchilari bevosita harbiy to‘qnashuvlar chizig‘ida bir necha kun o‘tkazishadi, keyin oldindan tayyorlangan pozitsiyalarga dam olish uchun qaytishadi, ularning o‘rniga quroldoshlari oldingi chiziqqa yo‘l olishadi. Fotoda 5-alohida shturm brigadasining «Bloxa» chaqiruv belgisiga ega 21 yoshli jangchisi Bogdan rotatsiya doirasidagi qisqa ta’til vaqtida.
Roman Pilipey / AFP / Scanpix / LETA

5-alohida shturm brigada jangchilari quroldoshlari o‘rnini egallash uchun Chasiv Yar atrofidagi pozitsiyalarga yo‘l olmoqda.
Roman Pilipey / AFP / Scanpix / LETA

Dnipro o‘qqa tutilishi

Rossiya qo‘shini 2 aprel kuni Dnipro bo‘ylab raketa zarbasi yo‘lladi. 18 kishi jarohatlangan, jumladan besh nafar bola ham, deb xabar bergan oblast ma’muriyati rahbari Sergey Lisak. To‘qqizta ko‘p kvartirali uylar hamda to‘rtta o‘quv binosi, jumladan bolalar bog‘chasi va sport kolleji, o‘nlab avtomobillar shikastlangan.

Zarba vaqtida shikastlangan sport kollejida «qariyb 40 yildan bo‘lajak sport yulduzlari», jumladan olimpiya jamoasiga kirgan sportchilar tarbiyalab kelingan, deb eslatgan oblast ma’muriyati rahbari Sergey Lisak
Mykola Synelnykov / Reuters / Scanpix / LETA

Kollej tarbiyalanuvchilari jabrlanmagan, ular havo trevogasi signali chalinishi bilan boshpanalarga tushishgan. «Ammo baribir — dushman ularga yo‘naltirgan tajovuz o‘z izini qoldiradi. Iz qoldiradi, ammo sindira olmaydi. Chunki ular — Ukraina kelajagi. Va kelajak uchun kurash davom etadi. Har kim o‘z sport turida natijalarga erishadi», — deya qayd etgan oblast rahbari.
Arsen Dzodzaiev / Anadolu / ddp / Vida Press

Arsen Dzodzaiev / Anadolu / ddp / Vida Press

Dnipro o‘qqa tutilishi fakti bo‘yicha huquq-tartibot organlari urush urf-odatlarini buzish bo‘yicha (Ukraina JK 438-modda, 1-qism) sudga qadar surishtiruv ishlari olib borilmoqda, deb xabar qilgan bosh prokuror ofisi
Arsen Dzodzaiev / EPA / Scanpix / LETA

Donetsk o‘qqa tutilishi oqibatlari

O‘zini o‘zi e’lon qilgan DXR hukumati 2 aprel kuni Donetsk shahriga ukrain harbiylari tomonidan besh bor o‘qqa tutilganini ma’lum qildi. Kun davomida Kiyev, Kirov va Petrov rayonlari yo‘nalishida jami 14 ta snaryad uchirilgan, degan shaharning Rossiya tomonidan tayinlangan rahbari Aleksey Kulemzin.