Toshkentda aholi tomonidan sezilgan inflatsiya 17,2 foizga yetdi

Markaziy bank mart oyi uchun aholi va tadbirkorlik sub’yektlari tomonidan sezilgan inflatsiya darajasi haqidagi ma’lumotlarni e’lon qildi.

Unga ko‘ra, aholi tomonidan sezilgan inflatsiya darajasi 12,7 foizni tashkil qilgan. Hududlar kesimida inflatsiyaning eng yuqori darajasi Toshkent shahri – 17,2 foiz va Farg‘ona viloyatida – 15,3 foiz, eng past darajasi esa Qoraqalpog‘iston – 9,3 foiz va Jizzax viloyatida – 10,1 foiz sezilgan. 

So‘rovnomada qatnashganlarning katta qismi benzin va yoqilg‘i hamda meva-sabzavotlar narxlarida yuqori o‘sish kuzatilganini qayd etgan. 

Daromadlari 7 mln so‘m va undan yuqori bo‘lgan aholining sezilgan inflatsiya darajasi respublika bo‘yicha o‘rtacha ko‘rsatkichdan yuqori darajada shakllangan. Xususan, 15 mln so‘mdan ko‘p daromad egalari sezgan inflatsiya 19,3 foizni tashkil qilgan. Toshkent shahrida 21 foiz va undan yuqori inflatsiya sezayotganlar ulushi 31 foizga, Farg‘ona viloyatida esa 24 foizga yetgan.

Avvalroq, fevralda iste’mol sektoridagi narxlarning yillik o‘sish darajasi 7,98 foizni tashkil etgani xabar qilingandi. O‘tgan oyda sezilgan va rasmiy inflatsiya o‘rtasidagi farq 4,72 foiz bo‘lgan.