«Dadam hamma bolasini o‘qitishni niyat qilgan»
Farzand oilada ko‘rganini qilib katta bo‘ladi. Ota-onam o‘zlari oliy ma’lumotli bo‘lmasa ham, farzandlari o‘qishlari uchun hamma sharoitni qilib berishgan, biz buni ko‘rib katta bo‘lganmiz.
Ba’zi oilalarda qiz farzandlarini o‘qitishni xohlashmaydi, lekin bizda unday bo‘lmagan. Dadam «Hamma qizlarimni o‘qitib, oliy ma’lumotli qilaman», deb niyat qilgan.
Men birinchi yildan o‘qishga kira olmaganman. Bu payti sinfdosh qizlarning deyarli hammasi turmushga chiqib bo‘lgandi. Lekin uydagilar menga oila qurish haqida gap ochmagan. Litseyda o‘qigan paytlarim ham abituriyent bo‘lib onamga yordam bera olmas edim. Ota-onam mehribonliklari sabab bizga hech ish buyurishmas edi. Bir yillik "yiqilish"dan so‘ng ikkinchi yil Xalqaro islom akademiyasiga o‘qishga kirdim. Faqat kontrakt asosida o‘qiganman.
Akam kontraktimga yordam bergan, meni moliyaviy qo‘llab-quvvatlagan.
O‘qishni tugatib, o‘z mahalladoshimga, o‘zim bilan bitta OTMda o‘qigan insonga turmushga chiqdim, bu borada ham ota-onam tanlovimni qo‘llab-quvvatlagan.
«Yosh kitobxon» tanlovi
Kitobxonlik tanlovi haqidagi roliklarni doimiy kuzatib borardim, lekin tanlovga doimiy qatnashib yurmasdim. O‘tgan yili yaqin dugonam «Yosh kitobxon»ga qatnashdi va shundan so‘ng menda ham qiziqish oshib, bu yil tanlovda qatnashdim.
Tanlovga tayyorlanishda yosh farzandim bo‘lgani sabab biroz qiyinchiliklar bo‘ldi. Lekin turmush o‘rtog‘im yordam berib, ishdan kelganidan so‘ng ham kitob o‘qishimga sharoit qilib berardi.
Tanlovda qatnashib, o‘zimda kitobxonlikni odat sifatida shakllantirdim. Avval bo‘sh vaqtimda kitob o‘qigan bo‘lsam, hozir kun davomida kitob o‘qish uchun vaqt ajratishni odat qilganman. Bundan tashqari, kitobxonlik tanlovida qatnashishni maqsad qilgan yoshlarga yordam beruvchi yo‘naltiruvchi Telegram-guruhi ochganman. Ingliz tilim ustida ham ishlayapman, magistraturaga topshirishni reja qilganman.
«Kitob o‘qiganim uchun Cobalt berishdi»
