Rossiyada Ishim daryosidagi suv sathi tarixiy rekordni yangiladi

Ishim daryosida suv sathi ko‘tarilishda davom etmoqda. Tyumen viloyati gubernatori Aleksandr Moorning Telegram’da 29 aprel, dushanba kuni xabar berishicha, Abatskoye qishlog‘idagi o‘lchash stansiyasida u yana bir tarixiy cho‘qqi – 1215 smga yetdi. 

Gubernatorning so‘zlariga ko‘ra, «vaziyat tarangligicha qolmoqda» va bir kun oldin yog‘gan yomg‘ir tufayli suv sathi ko‘tarilishda davom etmoqda. 

Tobol daryosiga bo‘yicha, gubernator keltirgan tezkor shtabning yangilangan ma’lumotlariga ko‘ra, Tyumen viloyati Uporovo qishlog‘ida, «ehtimol» tarixiy maksimal darajaga erishilmaydi. «Daryo kuniga 30-40 smga ko‘tarilmoqda (hozirgi suv sathi - 748 sm), o‘sish 1 maygacha davom etadi», - dedi Moor va to‘g‘onni mustahkamlash bo‘yicha barcha ishlar amalga oshirilganini qo‘shimcha qildi. 

9 mingdan ortiq uy suv ostida qolgan 

Ayni vaqtda, Rossiya Favqulodda vaziyatlar vazirligi Telegram’da 29 aprel tong holatiga ko‘ra, Rossiya Federatsiyasining 18 ta sub’yektida suv toshqinlari oqibatida 9300 ta turar joy binosi va 26 mingga yaqin xo‘jalik uchastkalari suv ostida qolayotgani haqida ma’lum qildi. Bundan tashqari, 51 ta past suvli ko‘prik va 87 ta yo‘l uchastkasi suv toshqini oqibatida zarar ko‘rgan. 

Tyumen viloyatida, departament ma’lumotlariga ko‘ra, 32 ta aholi punktidagi 188 ta turar joy va 523 ta qishloq uylari suv ostida qolmoqda. «Rossiya Favqulodda vaziyatlar vazirligining qutqaruvchilari aloqa uzilib qolgan qishloqlardan odamlarni, ularning uy hayvonlarini olib o‘tishmoqda, oziq-ovqat va dori-darmonlarni yetkazib berishmoqda», — deyiladi vazirlik matbuot xizmati xabarida.

Rossiya Federatsiyasining Kurgan viloyatida, Favqulodda vaziyatlar vazirligi ma’lumotlariga ko‘ra, 26 ta aholi punktida 1100 dan ortiq turar joy va 6700 dan ortiq qishloq uylari suv ostida qolmoqda. 24 soat ichida mintaqaning 4 ta munitsipalitetidagi 955 ta turar joy va 76 ta qishloq uylari suvdan tozalandi, deyiladi xabarda. Kurgandan quyiroq yo‘nalishda o‘tuvchi Tobol daryosidagi suv oqimi asta-sekin kuch va tezligini yo‘qotmoqda, deya ta’kidlab o‘tdi viloyat gubernatori Vadim Shumkov. «Ammo hushyorlikni yo‘qotish kerak emas», deya qo‘shimcha qildi u. 

Orenburg viloyatida 24 soat ichida 50 ga yaqin turar joy binolari va 65 ta tomorqa yerlari suvdan tozalandi, deyiladi Favqulodda vaziyatlar vazirligi xabarida. Viloyatda qancha uy suv ostida qolganiga aniqlik kiritilmagan.