HAMAS Isroil bilan tinchlik kelishuviga rozi bo‘ldi

Falastinning HAMAS harakati siyosiy byurosi rahbari Ismoil Honiya G‘azo sektorida sulh tuzish haqidagi taklifni qabul qilishga tayyorligini aytdi.

Foto: Reuters

Bu haqda u Qatar bosh vaziri Muhammad bin Abdurahmon bin Jasim Ol Soniy va Misr Bosh razvedka xizmati rahbari Abbos Komil bilan telefon orqali suhbatda ma’lum qilgan. Qatar va Misr HAMAS va Isroil o‘rtasidagi muzokaralarda vositachilik qilmoqda.

«Ularga HAMAS harakati o‘t ochishni to‘xtatish haqidagi kelishuv bo‘yicha takliflarni ma’qullagani haqida xabar berdim», deb «Kommersant» Honiya bayonotidan iqtibos keltirdi.

Bundan sal oldin The Times of Israel nashri Isroil armiyasi Rafah shahrining sharqiy mintaqasida aholini evakuatsiya qilinishga chaqiruvchi varaqalar tarqata boshlagani haqida xabar bergan edi. Isroil G‘azo sektorining janubida joylashgan shaharda harbiy amaliyot o‘tkazmoqchi, garchi g‘arbiy ittifoqchilari uni bundan qaytarayotgan bo‘lsa-da. Rafahda taxminan bir million qochqin yashamoqda.

29 aprel kuni muzokaralar chog‘ida HAMAS harakatiga 40 kunlik otashkesim taklif qilingan edi. Kelishuv, shuningdek, hamaschilar tomonidan garovga olinganlarni falastinlik mahbuslarga almashtirishni ham o‘z ichiga olardi.

AQSh Milliy xavfsizlik kengashining strategik aloqalar bo‘yicha koordinatori Jon Kirbi ushbu kelishuv Rafah operatsiyasini kechiktirishini taxmin qildi. Biroq Isroil bosh vaziri Binyamin Netanyahu bo‘lajak harbiy operatsiya HAMAS bilan muzokaralar natijasiga bog‘liq emasligini aytdi.

Isroil va HAMAS o‘rtasida sulh bo‘yicha muzokaralar bir necha oydan beri davom etmoqda.

#Isroil #Falastin #Hamas

2023 yil 7 oktyabr kuni G‘azo bo‘lgasidagi Hamas kuchlari Isroilga yoppasiga raketa zarbalari berib, chegaradagi aholi punktlarini egallay boshladi. Bunga javoban Isroil qo‘shinlari G‘azo bo‘lgasiga bostirib kirdi. Bu safargi eskalatsiya avval kuzatilmagan darajada ko‘p qurbonlarga olib keldi.