Oq uy AQSh Kongressiga Isroilga yangi qurol paketini, jumladan zirhli texnika uchun 700 million dollar va boshqa harbiy texnika uchun yana 500 million dollar yetkazib berish niyati haqida ma’lum qildi, deb yozadi The Wall Street Journal.
AQSh prezidenti Jo Bayden ma’muriyati 14 may, seshanba kuni AQSh Kongressiga Isroilga qiymati 1 milliard dollardan ortiq bo‘lgan yangi qurol-yarog‘ paketini yetkazib berish niyati haqida ma’lum qildi, deb yozadi Amerikaning Wall Street Journal nashri ma’muriyatning ismini oshkor etmagan xodimiga tayanib.
Bu ma’lumotlarga ko‘ra, paketga zirhli texnikalar uchun 700 million dollar (647 million yevro), boshqa harbiy texnika uchun yana 500 million dollar (462 million yevro) va minomyotlar uchun 60 million dollar (55 million yevro) kiritilishi mumkin. Taxminlarga ko‘ra, ma’muriyat allaqachon bunday yetkazib berishni tasdiqlash jarayonini boshlagan.
O‘z navbatida, CNN telekanali AQSh Kongressidagi anonim manbalarga tayanib xabar berishicha, Oq uy Isroilga qurol yetkazib berishda yangi kelishuvni tasdiqlash bo‘yicha uzoq jarayonni endigina boshlamoqda. Ushbu ma’lumotlarga ko‘ra, Davlat departamenti Vakillar palatasi va Senatning tegishli qo‘mitalari bilan muzokaralarni boshlagan, ammo Kongress bo‘lajak kelishuv haqida rasman xabardor qilinishi kerak bo‘lgan aniq muddat yo‘q.
Bayden Isroilga bir qator qurollar yetkazib berishni to‘xtatish bilan tahdid qildi
Bir necha kun oldin AQSh prezidenti Jo Bayden Isroil G‘azo sektori janubidagi Rafah shahrida harbiy amaliyot boshlasa, unga ayrim turdagi qurol-yarog‘ yetkazib berishni to‘xtatish bilan tahdid qildi. «Men aniq aytdimki, agar isroilliklar Rafahga kirsa - ular hali buni qilmadi - men ularga tarixan bunday operatsiyalar uchun foydalaniladigan qurollarni bermayman», dedi Amerika rahbari CNN telekanaliga intervyusida. Baydenning aytishicha, Rafah operatsiyasi «noto‘g‘ri». «Biz buning uchun qurol va artilleriya o‘q-dorilarini bermoqchi emasmiz», deb ta’kidladi Oq uyning amaldagi rahbari.
Avvalroq AQSh Isroilga og‘irligi 907 kg bo‘lgan 1800 ta va 226 kilogrammli 1700 ta bomba yetkazib berishni kechiktirgani ma’lum bo‘lgan edi. Bayden CNN telekanaliga bergan intervyusida G‘azo sektorida bunday bombalardan foydalanish natijasida tinch aholi halok bo‘lganini aytdi. AQSh prezidenti TsAHAL bu bombalardan Rafahga hujum paytida foydalanishi mumkinligidan xavotirda, deb yozadi The New York Times manbalarga tayanib.
Isroil G‘azo sektoridagi «Rafah» o‘tkazish punktini egallab oldi
7 mayga o‘tar kechasi Isroil harbiylari G‘azo sektorining janubiy qismida Misr bilan chegaradosh «Rafah» nazorat-o‘tkazish punktining Falastin qismi ustidan «tezkor nazorat» o‘rnatilgani haqida e’lon qildi. Isroil ommaviy axborot vositalari nazorat-o‘tkazish punktining Falastin qismi ustida Isroil bayrog‘i hilpirab turgani aks etgan kadrlarni namoyish etdi.
Isroil-Falastin mojarosi
7 oktyabr kuni ertalab HAMASning harbiy qanoti - «Izzaddin al-Qassam brigadalari» Isroilga qarshi «Al-Aqso to‘foni» operatsiyasi boshlanganini e’lon qildi. G‘azo sektoridan Isroil tomon minglab raketalar otildi, qurolli guruhlar Isroil aholi punktlariga kirdi.
HAMASning bildirishicha, operatsiya bosib olingan Sharqiy Quddusdagi Al-Aqso masjidiga bostirib kirish va isroillik muhojirlarning falastinliklarga nisbatan zo‘ravonligi kuchayib borayotganiga javoban amalga oshirilgan.
Bunga javoban Isroil armiyasi G‘azo sektorida HAMASga qarshi o‘nlab qiruvchi samolyotlardan foydalangan holda «Temir qilichlar» operatsiyasi boshlanganini e’lon qildi.
Isroil-Falastin mojarosi avj olgandan beri 35 mingdan ortiq falastinlik halok bo‘ldi. Isroilda qurbonlar soni 1400 dan oshadi. G‘azoning 2,3 million aholisi Isroilning havodan ommaviy bombardimon qilishi va eksklavning to‘liq blokadasi tufayli oziq-ovqat, suv va dori-darmonlar tanqisligidan aziyat chekmoqda.
