21:25 / 04.06.2024
3166

AQSh G‘azo bo‘yicha yangi rezolyutsiya loyihasini BMT Xavfsizlik kengashiga taqdim qildi

Rezolyutsiya Jo Baydenning Isroil va HAMAS o‘rtasida o‘t ochishni to‘xtatish haqidagi taklifini qo‘llab-quvvatlashga qaratilgan.

Foto: Anadolu Agency

Qo‘shma Shtatlar BMT Xavfsizlik Kengashiga G‘azo sektori bo‘yicha yangi rezolyutsiya loyihasini taqdim etdi, bu loyiha prezident Jo Baydenning Isroil va Falastinning HAMAS harakati o‘rtasida o‘t ochishni to‘xtatish haqidagi taklifini qo‘llab-quvvatlashga qaratilgan. Bu haqda Anadolu yozdi. 

BMTdagi AQSh doimiy vakili Linda Tomas-Grinfildga ko‘ra, ayrim rahbarlar va hukumatlar, jumladan, mintaqadagilar Bayden tomonidan bildirilgan taklifni qo‘llab-quvvatlamoqda. 

Tomas-Grinfild BMT Xavfsizlik Kengashiga a’zo davlatlarni taklifni amalga oshirishni qo‘llab-quvvatlashga chaqirdi. 

«Taklifning amalga oshirilishi zudlik bilan o‘t ochishni to‘xtatishni, asirlarni ozod qilishni, Isroil qo‘shinlarini G‘azodan olib chiqib ketishni, gumanitar yordamni ko‘paytirishni, asosiy xizmatlarni tiklashni, Falastin tinch fuqarolarini G‘azo shimoliga qaytarishni, inqirozni bartaraf etish uchun «yo‘l xaritasini» tuzishni, G‘azoni tiklashni ta’minlaydi. Oxir oqibat, bu urushning tugashiga olib keladi, bu Isroil xavfsizligini va G‘azoning tinch aholisiga yordam beradi», dedi u. 

Tomas-Grinfild, shuningdek, Xavfsizlik Kengashi bitimni Falastinning HAMAS harakati vakillari tomonidan qabul qilinishini talab etishi kerakligini ta’kidladi. 

Rezolyutsiya loyihasida HAMAS zudlik bilan o‘t ochishni to‘xtatish, asirlarni ozod qilish, Isroil qo‘shinlarini G‘azodan olib chiqib ketish, gumanitar yordam hajmini oshirish, asosiy xizmatlarni tiklash imkonini beradigan taklifni qabul qilish va unga amal qilishga chaqiriladi. 

Rezolyutsiya loyihasida tomonlarning kelishuv qoidalariga rioya etishi muhimligi ta’kidlanadi va BMT Xavfsizlik Kengashi va BMT a’zolaridan yordam so‘raladi. 

Rezolyutsiya mualliflari, shuningdek, Isroil-Falastin mojarosini hal qilish uchun «ikki xalq uchun ikki davlat» konsepsiyasini qo‘llab-quvvatlashini bildirishdi.

Mavzu
HAMAS–Isroil urushi
7 oktyabr kuni G‘azo bo‘lgasidagi HAMAS kuchlari Isroilga yoppasiga raketa zarbalari berdi va chegaradagi aholi punktlarini egallay boshladi. Bunga javoban Isroil tashkilotga qarshi urush ochdi. Bu safargi eskalatsiya avval kuzatilmagan darajada ko‘p qurbonlarga olib keldi.
Barchasi
Top