Belarus rahbari Lukashenko mamlakat omon qolishi uchun o‘zgarishlar zarurligini aytdi. «Hokimiyatga yosh, istiqbolli va professional odamlar kelishi kerak», - dedi u.
Belarus yetakchisi Aleksandr Lukashenko hukumat va o‘z ma’muriyatidagi muhim lavozimlarda o‘zgarishlarni amalga oshirdi. «Hokimiyatga yosh, istiqbolli va professional odamlar kelishi kerak. Agar biz bu shiddatli kurashda omon qolishni xohlasak, samaradorlikni oshirish lozim», dedi Lukashenko 27 iyun, payshanba kuni Minskda.
Ma’muriyat va TIV yangi rahbarlari
Shu tariqa, Lukashenko Dmitriy Krutoyni ma’muriyatning yangi rahbari etib tayinladi, u avvalroq Belarusning Rossiya Federatsiyasidagi elchisi bo‘lib ishlagan. Maksim Rijyenkov Belarus tashqi ishlar vaziri etib tayinlandi. «Tashqi ishlar vazirligini ish holatiga keltirish kerak, men ochiq aytaman: Tashqi ishlar vazirligi ishlashni boshlashi shart. Ishlashni istamaganlar ham, bugun meni eshitmayotganlar ham ishlamasligi kerak», - dedi Lukashenko.
Rijyenkov Respublika kengashiga ishga o‘tayotgan Sergey Aleynik o‘rniga keladi. Aleynik Belarus tashqi ishlar vazirligini 2022 yil oxirida o‘zidan oldingi mansabdor Vladimir Makey kutilmaganda vafot etganidan keyin boshqargan. Makeyning kutilmagan o‘limi uning zaharlangan bo‘lishi mumkinligi haqidagi taxminlarni keltirib chiqardi.
Boshqa tayinlovlar
Lukashenko Natalya Petkevichni o‘z ma’muriyati rahbarining birinchi o‘rinbosari lavozimiga tayinladi, u ko‘p yillar davomida ushbu tuzilmada ishlagan va Belarus yetakchisiga ko‘ra, talabchan, prinsipial va tajribali rahbar hisoblanadi.
Brest viloyati ijroiya qo‘mitasi raisi Yuriy Shuleyko bosh vazir o‘rinbosari bo‘ldi, qishloq xo‘jaligi va oziq-ovqat vazirligini esa Vitebsk viloyati ijroiya qo‘mitasi raisining birinchi o‘rinbosari Anatoliy Linevich boshqaradi.
Belarus Ukrainaga qarshi urushda Rossiyani qo‘llab-quvvatlaydi va xuddi Rossiya kabi G‘arb sanksiyalari ostida qolgan.
