Toshkentdagi serqatnov ko‘chalardan birida avtomobillar harakati 10 avgustgacha cheklanadi

Toshkent shahar Yunusobod tumani, Bog‘ishamol ko‘chasi va Toshkent halqa avtomobil yo‘li chorrahasidan, Mirzo Ulug‘bek tumanidagi Mirzo Ulug‘bek ko‘chasigacha bo‘lgan oraliq masofadagi avtomobil yo‘lida qurilish ishlari olib borilmoqda. Bu haqda poytaxt hokimligi matbuot xizmati Kun.uz’ga ma’lum qildi.

Shu sababli 30 iyul kuni soat 23:00 dan qurilish-montaj ishlari boshlandi. Qurilish ishlari 10 avgust kunida yakunlanishi rejalashtirilgan. Shu bois ushbu avtomobil yo‘lida transport vositalari harakati vaqtincha cheklanadi. 

Toshkent shahar hokimligi hamda Yunusobod tumani hokimligi keltirilgan noqulayliklar uchun uzr so‘raydi.

Avvalroq Mirzo Ulug‘bek tumanidagi Temur Malik ko‘chasini kengaytirish ishlari olib borilayotgani to‘g‘risida xabar berilgandi. Shu sababdan 20 iyundan 1 avgust kuniga qadar Temur Malik ko‘chasining Buyuk Ipak yo‘li ko‘chasi bilan kesishmasidagi «Buyuk Turon» ko‘prigi avtomobillar harakati uchun yopilgan. 

Hozirda Mirzo Ulug‘bek tumanining Temur Malik ko‘chasi, aniqrog‘i M39b Toshkent halqa avtomobil yo‘lining 34-36 km qismi rekonstruksiya qilinmoqda. Avtomobil yo‘llari qo‘mitasining Kun.uz’ga ma’lum qilishicha, obektni 2025 yilning 1-choragida foydalanishga topshirish rejalashtirilgan. Qurilish-montaj ishlari loyiha-smeta hujjatlariga asosan ikki bosqichda amalga oshiriladi.