AQSh Kursk viloyatidagi operatsiya maqsadlari haqida ko‘proq ma’lumot olmoqchi

Qo‘shma Shtatlar Rossiyaning Kursk viloyatidagi operatsiya maqsadlari haqida ko‘proq bilish uchun ukrainalik harbiylar bilan bog‘lanmoqda, dedi Oq uy matbuot kotibi Karin Jan-Per 7 avgust, chorshanba kuni bo‘lib o‘tgan brifingda. Uning so‘zlariga ko‘ra, Qo‘shma Shtatlar Ukrainaning rus qo‘shinlari hujumlarini to‘xtatish bo‘yicha «oqilona» harakatlarini qo‘llab-quvvatlaydi.

O‘z navbatida, Oq uy Milliy xavfsizlik kengashining strategik aloqalar bo‘yicha koordinatori Jon Kirbi AQShning Ukraina Qurolli kuchlari tomonidan Amerika qurollaridan foydalanish bo‘yicha siyosatida «hech narsa o‘zgarmaganini» ta’kidladi: Vashington Rossiyadagi nishonlarga zarba berishga ruxsat beradi. 

Davlat departamenti matbuot kotibi Metyu Millerning aytishicha, Ukraina AQShni Kursk viloyatida harbiy operatsiya o‘tkazish rejalari haqida ogohlantirmagan, biroq bu hech qanday kelishuvlarni buzmaydi. «Bu ular kurashayotgan urush. Biz ularni jihozlar va maslahatlar bilan ta’minlaymiz. Lekin kundalik taktika haqida gap ketganda, ba’zida biz ular bilan muloqot qilamiz, ba’zida esa aloqa qilmaymiz. Va ular bu qarorlarni qabul qilishlari o‘rinli», dedi Miller brifingda.

U Moskvaning Ukraina hujumini qoralaganini rad etdi. «Rossiya hukumatining bayonotlarini ko‘rdim, ammo Rossiya Ukrainaning hududiy yaxlitligi va suverenitetini buzgan», - deya ta’kidladi Davlat departamenti vakili. Rossiya prezidenti Vladimir Putin chorshanba kuni hukumat a’zolari bilan uchrashuvda Ukrainaning Kursk viloyatida «keng ko‘lamli provokatsiyasi» haqida e’lon qildi.

Miller, shuningdek, AQShning Ukraina Amerika qurollaridan foydalanishiga oid qoidalari o‘z kuchida qolayotganiga e’tibor qaratdi, ammo Kiyev harakatlari «siyosatimizni buzmaydi» dedi. AQSh prezidenti Jo Bayden may oyida Kiyevga Rossiyaning Xarkiv viloyatiga hujumini qaytarish uchun Ukraina chegarasi bo‘ylab Rossiya hududida joylashgan nishonlarga AQSh tomonidan yetkazib berilgan qurollardan foydalanishga ruxsat bergan edi.

Kursk viloyatida janglar

Kursk viloyatining Sudjanskiy va Korenevskiy tumanlarida oxirgi ikki kundan beri janglar davom etmoqda. Rossiya Mudofaa vazirligi va harbiy ekspertlar ma’lumotlariga ko‘ra, Ukraina armiyasining bo‘linmalari Rossiya Federatsiyasi hududiga kirib kelgan. Kamida ikkita rossiyalik harbiy xizmatchi asirga olindi va rus armiyasi Ka-52 vertolyotini yo‘qotdi - u FPV-dron tomonidan urib tushirildi. Rossiya rasmiylari «dushmanning oldinga siljishini to‘xtatilgan» va «vaziyat nazorat qilinmoqda» deya ishontirdi, ammo chegaradan 10 kilometr uzoqlikdagi 5000 aholisi bo‘lgan Sudja shahrida janglar haqida dalillar paydo bo‘lmoqda. Ukraina tomoni chegaradagi o‘zgarishlar haqidagi xabarga rasman izoh bermadi.