AQSh, Eron va Livan ishtirokida maxsus tartibga solish guruhi tuziladi

Vazirlik bayonotiga ko‘ra, o‘zaro anglashuv memorandumida belgilangan muddat davomida tomonlar o‘rtasida doimiy muloqot mexanizmi ishga tushiriladi. Ushbu aloqa kanali Ho‘rmuz bo‘g‘ozi orqali harakatlanuvchi savdo kemalarining xavfsiz qatnovini ta’minlash va har qanday mojaroli holatlarning oldini olishga xizmat qiladi.

Shuningdek, muzokaralar jarayonini nazorat qiluvchi yuqori darajadagi qo‘mita AQSh va Eron o‘rtasida yakuniy kelishuvga erishish bo‘yicha 60 kunlik «yo‘l xaritasi»ni tasdiqladi. Bu esa texnik muzokaralarni zudlik bilan davom ettirish uchun asos yaratdi.

Tomonlar yana bir muhim qaror qabul qilib, AQSh, Eron va Livan vakillaridan iborat maxsus tartibga solish guruhini tashkil etishga kelishib oldi. Ushbu guruh vositachilar ko‘magida Livanda harbiy harakatlarni to‘xtatish bo‘yicha memorandum shartlarining bajarilishini ta’minlash bilan shug‘ullanadi.

Qatar TIV ma’lum qilishicha, barcha texnik muzokaralar hafta oxiriga qadar Shveytsariyaning Lyutsern shahri yaqinidagi Byurgenshtok kurortida davom etadi.

Qatar va Pokiston rasmiylari Vashington hamda Tehronning diplomatik muloqot va mojaroni tinch yo‘l bilan hal etishga bo‘lgan intilishini yuqori baholadi. Shu bilan birga, muzokaralarni qo‘llab-quvvatlagan boshqa davlatlarga ham minnatdorlik bildirildi.

Qatar Tashqi ishlar vazirligi muzokaralar ijobiy va konstruktiv ruhda o‘tganini ta’kidlab, tomonlar o‘rtasida sezilarli taraqqiyotga erishilganini ma’lum qildi.

Kelishuvga muvofiq, bosh muzokarachilar yuqori darajadagi qo‘mitaga muntazam hisobot berib boradi. Shuningdek, ular yadroviy dastur, sanksiyalar, monitoring va bahslarni hal etish masalalari bo‘yicha ishchi guruhlarga rahbarlik qiladi.

Eron tashqi ishlar vaziri Abbos Arag‘chi erishilgan kelishuvlarni ijtimoiy tarmoqda «Livandagi harbiy harakatlarni to‘xtatish yo‘lidagi katta yutuq» deb baholadi.

Muzokaralar arafasida Tehron Isroilning Livandagi harbiy operatsiyalari davom etayotgani sababli Ho‘rmuz bo‘g‘ozi yana yopilganini e’lon qilgan edi. Eron Qurolli kuchlari qo‘shma qo‘mondonligi AQSh o‘z majburiyatlarini bajarmagani va urushni to‘xtatmagani uchun mazkur qaror qabul qilinganini bildirgan.

15 iyun kuni AQSh prezidenti Donald Tramp va Eron prezidenti Mas’ud Pezeshkiyon aprel oyida e’lon qilingan sulhni uzaytirishni nazarda tutuvchi hadli kelishuvni imzolagan edi. Hujjatda Ho‘rmuz bo‘g‘ozini qayta ochish va keyingi muzokaralarni 60 kun ichida yakunlash vazifasi belgilangan.