«Siti» mavsum startiga yomon holatda yetib keldi. APLda o‘tgan mavsumning eng yaxshi Foden hali boshlang‘ich tarkibda o‘ynashga tayyor emas, Angliya milliy jamoasi safida Yevroda qatnashgan boshqa futbolchilar — Stounz va Uoker ham. Rodri esa o‘yin qaydnomasiga ham kiritilmadi — Yevro-2024 finalida jarohat olgan ispaniyalik yarimhimoyachi hali «Siti» bilan biror mashg‘ulot o‘tkazmadi. Mavsumoldi yig‘inlari vaqtida barchaning e’tiborini o‘ziga qaratgan Oskar Bobb esa mavsum starti arafasida jiddiy jarohat olib, uch-to‘rt oyga safdan chiqdi. Natijada Pep Gvardiola maydon markaziga Kovachichni, hujum qanotlariga — Doku va Savioni joylashtirdi, lekin Doku o‘ziga begona bo‘lgan o‘ng qanotda tushdi.
«Chelsi»ning mavsumdagi birinchi o‘yin uchun tarkibini oldindan taxmin qilish mumkin edi. Londonliklar bu yozda ham faol bo‘lib, qator yangi futbolchilar sotib olgan bo‘lsa-da, boshlang‘ich tarkib asosan o‘tgan yil o‘ynagan futbolchilardan iborat bo‘ldi. Faqat Sterling hatto zaxira o‘rindig‘idan ham joy olmagani biroz ajablantirdi. Holbuki u o‘tgan mavsumda jamoaning uchinchi samarador futbolchisi bo‘lgandi (barcha turnirlar doirasida 10+8).
Uning vakillari ham bundan hayron ekanliklarini ochiq bildirishdi. OAV ma’lumotiga ko‘ra, Sterling Gallaher, Lukaku, Kepa, Chaloba kabi klub xayrlashmoqchi bo‘lgan futbolchilar qatoridan joy olgan. U katta ehtimol bilan «Yuve» hujumchisi Kiyezaga almashtiriladi.
Bu o‘yinda golni uzoq kutishga to‘g‘ri kelmadi. Doku qanotdan uzatma berdi, Bernardu Silva to‘pga bir teginishda Holandga yo‘naltirdi, norvegiyalik to‘purar esa barcha himoyachilardan o‘zib ketib, yaqin masofadan darvozabonni dog‘da qoldirdi. U APLda «katta oltilik» vakillariga qarshi o‘yinlarda 22 gol urib ulgurdi.
«Chelsi» «Siti»ning goligacha ham, undan keyin ham ochiq futbol namoyish etishga harakat qildi. Va «Chelsi»da vaziyatlar ham bo‘ldi. Mezbonlar uch marta penalti so‘rashdi, ammo har safar hakam vaziyatlarni fol deb topmadi. Savio Enso Fernandes bilan to‘qnashuvda chindan qo‘pollik qilgandi, ammo bu jarima maydoni tashqarisida edi.
Mavzuga oid
«Chelsi» 44-daqiqada darvozani ishg‘ol etdi, ammo Jyekson ofsaydda qolgani ma’lum bo‘ldi. O‘yinda ikkinchi bor. O‘tgan mavsumda u 28 bor ofsaydga tushgandi. Undan ko‘proq ko‘rsatkich faqat «Liverpul» hujumchisi Nunesda qayd etilgan — 33.
Tanaffusda Gvardiola Savio o‘rniga Fodenni tushirdi. Braziliyalik vinger debyut o‘yinida hujumda yaxshi harakatlandi (u avvaliga chap qanotda tushgandi, ammo keyin Doku bilan kelishgan holda o‘z qanotlariga qaytishdi), ammo himoyada bir necha bor pozitsiyani yo‘qotib qo‘ydi.
Ikkinchi bo‘limda ikki tomon ham ochiq futbol namoyish etishga o‘tdi (umuman, shu kuni «Chelsi» «Siti» jarima maydonida 26 marta to‘pga tegindi, bu «Siti» uchun juda ko‘p. O‘tgan mavsumda, barcha musobaqalar hisobga olinganda ham, raqiblar faqat ikki marta raqiblar bu ko‘rsatkichga yetib borgan: «Arsenal» va «Aston Villa»), to‘p Kovachichning bilagiga tekkan vaziyat esa hal qiluvchi palla bo‘ldi. O‘tgan mavsumda hakamlar bu holatni to‘pni qo‘l bilan o‘ynash deb topib, penalti belgilagan bo‘lardi. Joriy mavsumdan esa APL hakamlarning qarorini izohlab boradigan (ammo baho bermaydigan) akkauntni ishga tushirdi. Bu holatda zarba berish nuqtasi va qo‘l oralig‘idagi masofa qisqaligi hisobga olingani aytildi (masofa chindan ham katta emasdi). Qolaversa, bu vaziyatda to‘p avvaliga Kovachichning oyog‘iga tekkani ham ahamiyatga ega bo‘lgandi.
Bu epizoddan ko‘p o‘tmay «Siti» ikkinchi golni urdi. Bu ishni esa aynan Kovachich amalga oshirdi. U maydonning raqib tomonida to‘pni egallab olib, raqib jarima maydoni tomon qarshilikka uchramasdan yaqinlashib bordi va yaqin burchakka kuchli zarba berdi. «Chelsi» darvozaboni Sanches yaxshiroq o‘ynashi mumkin edi, ammo to‘pni o‘tkazib yubordi. Xorvatiyalik yarimhimoyachi esa qo‘llarini ikki yonga yoyganch, sobiq jamoasiga urgan golini nishonlamasligini ko‘rsatdi.
Holand esa noodatiy rekord o‘rnatdi. Ushbu forvard 90 daqiqa davomida bergan 8 ta uzatmadan atigi 3 tasi aniqchiqdi — bu Xosep Gvardiola qo‘li ostida o‘ynagan futbolchilar orasida eng minimal ko‘rsatkich. Shunga qaramay, u goli tufayli o‘yinning eng yaxshi futbolchisi bo‘ldi.
Shu tariqa, «shaharliklar» maydonda o‘ziga o‘xshamagan bo‘lsa-da, qiyinchilik bilan uch ochkoni qo‘lga kiritdi. «Siti» mavsum startidayoq poygada bo‘lmasligini ko‘rsatmoqda, ammo jamoa ikkinchi davrada g‘alabalar seriyasi bilan poygaga qo‘shilishi aniq.
«Real» mavsumni 32 uchrashuvdan iborat rekord darajadagi mag‘lubiyatsiz seriya bilan (+24=8) ochdi va o‘yin boshidayoq gol o‘tkazib yuborish xavfi yuzaga keldi. Ammo Kurtua ajoyib seyv ijro etdi, shundan keyin madridliklar tashabbusni o‘z qo‘liga oldi. Jarima maydoni ichida Mbappe to‘pni yo‘qotgandek edi, ammo uni Vinisius Junior egallab Oldi va uning tovonda yo‘llagan pasidan keyin Rodrigo chiroyli zarba bilan uzoq burchakka yo‘naltirdi. Bu uning uchun an’anaga aylandi, braziliyalik hujumchi qatorasiga ikkinchi mavsumda «Qirollik klubi»ning chempionatdagi ilk golini urmoqda. Qolaversa, ushbu brazil la ligada gol+pas tizimida ochkolari sonini 50 (27+23) taga yetkazib, yubileyni nishonladi.
Ammo osonlik bilan hisob ochilishi tufayli madridliklar xotirjamlikka berildi va raqib buni kechirmadi. To‘p burchakdan oshirib berilganida Ryudiger trayektoriyani hisoblashda xatoga yo‘l qo‘ydi, Bellinghem esa uning ortini yopmadi va «ikkinchi qavat» bo‘yicha mutaxassis, baland bo‘yli Murichi muvozanatni tikladi. «Real» esa shundan keyin o‘yinni o‘ziga kerakli o‘zanga qaytara olmadi. Jamoa to‘pga egalik qildi, doimiy ravishda bosim o‘tkazdi, ammo mezbonlarni ikkinchi marta boshi berk ko‘chaga kiritib qo‘ya olmadi.
Mbappe barchasini o‘z uslubida, chap qanotga ko‘chgan holda hal qilishga urinishlari muvaffaqiyatsiz yakunlandi va darvozabonga muammo tug‘dira olmadi. Modrich maydonga tushishi o‘yinga yangi impuls bergandek ko‘ringandi, ammo u maydon markazida to‘p yo‘qotganida ikkinchi gol o‘tkazilishiga bir baxya qoldi. Qaymoqranglilar baxtiga Antonio Sanches bir necha daqiqa oralig‘ida ikki bor aniq zarba yo‘llay olmadi. Karlo Anchelotti o‘yin oxirida Bellinghem va Vinisiusni maydondan olishga qaror qilib, yangi kuchlarni tashlashi ham yordam bermadi. Mendi esa final hushtagi chalinishi arafasida tushunarsiz harakati bilan qizil kartochka oldi.
UYeFA Superkubogidagi g‘alabadan chalg‘imaslik kerak — «Real» yangi tarkibda o‘ynashni endi o‘rganmoqda, Mbappe mavsumoldi yig‘inlarining katta qismida jamoa bilan birga ishlamagani esa vazifani yanada qiyinlashtiradi. Hozircha esa Ispaniyada qiziqarli statistika aylanmoqda, unga ko‘ra yakshanba kunigacha Madrid jamoasi roppa-rosa 20 marta mavsumni durang bilan boshlagan va shundan faqat besh holatda chempion bo‘la olgan. Oxirgi marta — 18 yil oldin. Bu, albatta, titulni qo‘lga kiritish ehtimoli 25 foizga tushib ketishini anglatmaydi, ammo amaldagi chempionlar uchun taxt tomon qizil gilam to‘shalmasligi ham aniq.
«Real Sosiyedad» yangi mavsumni o‘tgan mavsumdagi yetakchilarining aksarini tarkibda saqlab qolgan holda boshlamoqda. Ammo basklar bosh murabbiyi Imanol Alguasil o‘zi la liganing eng yaxshi yarimhimoyachisi deb atagan Merinoni qaydnomaga kiritmadi. Bu u «Arsenal»ga transfer qilinayotgani bilan bog‘liq. Kubo tarkibda qolgan, Subimendi esa qadrdon klubiga sadoqatini namoyish etib, «Liverpul» taklifini rad etgan.
Birinchi turda u zaxirada qoldi va ikkinchi bo‘limda maydonga tushib, qo‘shimcha daqiqalarda hisobni qisqartiruvchi golga mualliflik qildi. Birinchi bo‘limda esa maydon markazida Mendes bilan birga yosh futbolchilar — Urko Gonsales va olimpiya chempioni Turrentes harakat qildi. Parij-2024 o‘yinlarining yana bir triumfatori Pacheko esa ayni vaqtda jamoaning asosiy markaziy himoyachisiga aylangan, u Yevropa chempionligidan keyin «Atletiko»ga yo‘l olgan Le Norman o‘rnini egalladi. Shunday ekan, aytish mumkinki, San-Sebastyanda navbatdagi avlodlar almashinuvi jarayoni boshlangan, yo‘qotishlar klub akademiyasining samarali ishi hisobiga kompensatsiya qilinadi.
Hozircha esa bu tarkibga birgalikdagi o‘yin amaliyoti yetishmayotgani yaqqol ko‘rinib qoldi. Bundan esa de Frutos foydalanib, himoyachilar xatosidan keyin to‘pni yaqin burchakka yo‘lladi. Ikkinchi bo‘lim oxirlarida Kamelio mezbonlarning umidini yo‘qqa chiqardi. Olimpiya finali overtaymida ikki gol bilan o‘yin taqdirini hal qilgan futbolchi Pachekodan qochib ketdi va «Rayo»ning g‘alabasini rasmiylashtirdi.
Antonio Konte o‘z to‘lqinida: «Neapolda men yaxshiroq vaziyatni ko‘raman deb o‘ylagandim. Qandaydir ijobiy syurprizlar kutgandim, ammo men ularni topishim qiyin bo‘lmoqda. O‘tgan yildan keyin barchasini tashlab ketib bo‘lmaydi deb o‘ylagandim, ammo buning o‘rniga biz 9-10 futbolchi ketib qolgan vaziyatdamiz. Men qanday qiyinchiliklarga duch kelishimiz haqida aniq bilaman, vaziyatni tushunib turibman va men katta birdamlik ko‘rsatishni so‘rayman. Men «Napoli»ga raqobatbardoshlikni qaytarish uchun qancha vaqt talab etilishini bilmayman — 6 oy yoki 3 yil, ammo biz tayyor bo‘lishimiz kerak. Va taslim bo‘lmasligimiz. Biz zo‘r bo‘lishimiz talab qilinadi».
Bu yangi futbolchilar kerakligiga aniq ishora, murabbiyning fikricha, 10-12 kishi olib kelish kerak. Konte bu haqda Italiya kubogi doirasidagi ilk rasmiy o‘yinidan keyin aytgandi, o‘shanda «Napoli» V seriya vakili «Modena»ga qarshi golsiz durangdan keyin faqat penaltilar seriyasida g‘olib chiqqandi. Nisbatan kuchliroq bo‘lgan «Verona»ga qarshi o‘yinda esa jamoaning o‘yini kuchayib qolmadi. Neapolitanliklar birinchi bo‘limda ko‘proq vaqtda to‘pga egalik qilishdi, ammo bu ustunlik maydonning uchinchi qismida kuzatilmadi, ikkinchi bo‘limda esa mezbonlar faollashdi.
Maydon egalari hujumlar uyushtira boshladi va gol ham urildi. Lazovich «shvedka» uslubida qanotdan pas berdi, Livramento esa Juan Jyezusdan o‘zib ketdi. Konte uchun sevimli bo‘lgan uch markaziy himoyachidan iborat sxema hozircha yaxshi ishlamayapti. Buni ikkinchi gol ham ko‘rsatib berdi, Duda jamoaning yana bir yangi futbolchisi — kolumbiyalik Moskerani darvozabon bilan yakkama-yakka holatga chiqarib yubordi. Zaxiradan o‘yinga qo‘shilgan ushbu futbolchi qo‘shimcha daqiqalarda yana bir gol urdi va hisobni yiriklashtirdi. Konte yangi futbolchilar olib kelish zarurligi borasida haq: «Napoli» darhol tarkibni kuchaytirishi lozim. Antonio qattiq istayotgan Lukakuning o‘zi bilan ish bitmaydi. Hozircha bir narsani qayd etish mumkin: sovrindor murabbiy faoliyatida ilk bor A seriyada mavsumni mag‘lubiyat bilan boshladi.
Birinchi turdagi tendensiya — yetakchi klublar uchun qiyinchilik bo‘lmoqda. Shanba kungi o‘yinlarda «Inter» ham, «Milan» ham bazo‘r durang o‘ynagandi. Yakshanba kuni «Napoli» yirik hisobda tor-mor etildi, «Roma» esa Sardiniyada raqib darvozasiga yo‘l topolmadi. Ikkinchi bo‘limda zaxiradan tushgan Dibala o‘yinni jonlantirdi, uning jamoa yozda amalga oshirgan eng asosiy transfer - ukrainalik hujumchi Artyom Dobvik tomon yumshoq uzatmalaridan biri golga aylanishi edi, ammo bir necha metr masofadan turib boshda yo‘llangan zarbadan keyin to‘p to‘singa tegdi. Boshqa tomondan, darvoza to‘sini Svilar to‘pning yo‘nalishini o‘zgartirganida rimliklarga ham yordam berdi. Boshqa vaziyatda Pellegrini qaytgan to‘pni darvozaga kiritishi bekor qilindi, chunki Dobvik zarba bergan vaqtda u ofsaydda qolib ketgandi.
Ijara muddati tugab, rimliklar safiga qaytgan Eldor Shomurodov esa qaydnomaga kiritilgan bo‘lsa-da, maydonga tushirilmadi. Jamoa bosh murabbiyi Daniyele de Rossi uni o‘z rejalariga kiritmagani haqida xabarlar chiqmoqda. Avvalroq, Eldor yangi mavsumni ijara asosida «Verona»da o‘tkazishi yoki MLS ishtirokchisi «Atalanta Yunayted» safiga o‘tishi mumkinligi haqida xabar qilingandi.
Kun statistikasi
Orsolini «Bolonya» safida qatorasiga yetti mavsumda gol urgan 2-futbolchi bo‘ldi. Bungacha so‘nggi 50 yil mobaynida bunday ko‘rsatkichga faqat Karlo Nervo erishgandi. Bu futbolchi qizil-ko‘klar safida o‘tgan asr oxiri va yangi asr boshida o‘ynagandi.
«Rapid» so‘nggi sakkiz mavsumdan 7 tasida ilk o‘yinda g‘alaba qozondi. Bu venaliklar klubining 1984 yilda o‘rnatilgan va 1988 yilda takrorlangan rekordi takrorlanishi bo‘ldi.
«Strasbur» boshlang‘ich tarkibidagi 11 futbolchidan 10 nafarining yoshi 23 dan kichik bo‘ldi. Bu liga 1 o‘yinlarida turnir haqidagi ma’lumotlar Opta kompaniyasi tomonidan hisoblab boriladigan mavsumdan buyon (1947/48) kuzatilgan ilk holatdir.
«Chelsi» hujumchisi Rahim Sterling so‘nggi 11 mavsumda ilk bor APLning ilk turida ishtirok etmadi.
«Manchester Siti» hujumchisi Holand APLning avgustdagi o‘yinlarida urgan gollari sonini 13 taga yetkazdi. Norvegiyalik hujumchi Angliyadagi debyutidan buyon yozning so‘nggi oyida urgan gollar soni «Chelsi» (11) va «MYu» (9) butun tarkib bo‘lib urgan gollardan ko‘proq.
Yarimhimoyachi Savane Fransiya chempionatida «Monpele» uchun 41 gol urgan. Bu klub tarixidagi uchinchi yaxshi natija, Loran Blanning ko‘rsatkichiga yana olti aniq zarba qolgan.
Holand «Siti» safidagi 100 o‘yinda gol+pas tizimida 106 (91+15) ochko ishlagan.
