Vashingtonda butun dunyoga ta’sir qiladigan voqea sodir bo‘ldi, Donald Tramp rasman AQSh prezidenti lavozimiga kirishdi. Mahalliy vaqt bilan soat 12:00 atrofida Trampning inauguratsiya marosimi boshlandi va rasman Oq uy rahbarligi Jo Baydendan Trampga o‘tdi.
«Men Donald Jon Tramp AQSh prezidenti vazifasini vijdonan bajarishga, Qo‘shma Shtatlar konstitutsiyasini qo‘llash, asrash, himoya qilishga tantanali qasamyod qilaman. Bu yo‘lda Xudo menga yor bo‘lsin», deb amerikalik soliq to‘lovchilar oldida ont ichdi Donald Tramp. Bu vaqtda AQShning 47-prezidenti qo‘llarini an’anaga ko‘ra Injilga qo‘yib turdi. Nasroniylar muqaddas kitobini esa bu gal ham Trampning xotini Melaniya ushlab turdi.
Videoni ko‘rgan bo‘lsangiz, Melaniyaning qo‘lida ikkita kitob bor edi. Ulardan biri Trampning shaxsiy kutubxonasida saqlanadigan, unga onasi 1955 yilda sovg‘a qilgan Injil. Ikkinchisi esa Avraam Linkoln 1861 yilda foydalangan Injil. Uni Amerikada Linkoln Injili deyishadi.
Marosim Kapitoliyning ichkarisida o‘tkazildi. Odatda inauguratsiya marosimi bu tarixiy bino tashqarisida o‘tkazilardi, lekin bu gal havo sovuqligi uchun uni Kapitoliy ichiga ko‘chirishdi. Marosimda AQShdagi barcha tirik sobiq prezidentlar Bill Klinton, Barak Obama, kichik Jorj Bush va Jo Bayden qatnashdi. Umumiy hisobda Kapitoliyda 200 ming atrofida odam yig‘ildi.
Tramp qasamyod qabul qilganidan keyin rasman AQSh prezidentiga aylandi va ilk bayonotini hali sahnadan tushmay berdi. U AQShning janubiy chegaralarida favqulodda holat e’lon qildi va noqonuniy migrantlar mamlakatni kesib o‘tishiga ortiq yo‘l qo‘yilmasligini aytdi. «Hamma noqonuniy migrantlar kelgan joyiga qaytariladi», dedi Tramp. Yangi prezident AQSh milliy gvardiyasini noqonuniy migrantlar kirib kelishiga qarshi turish uchun janubiy chegaralarga yuborishini aytdi.
Tramp narkotik savdosi bilan shug‘ullanadigan kartellarni terrorchilik tashkiloti deb e’lon qilishini bildirdi. Shuningdek, AQSh rasman doirada faqat ikki jinsni – erkak va ayol jinsini tan olishini ma’lum qildi.
Trampning inauguratsiyagacha bo‘lgan boshqa davlatlarni qo‘shib olish gaplari shunchaki gap emas ekan, chunki respublikachi prezidentlikka kirishgan ilk daqiqalaridayoq bu gapini takrorladi. «Bayrog‘imiz yangi va ajoyib gorizontlarda hilpiraydi, fazogirlarimiz esa AQSh bayrog‘ini Marsga o‘rnatishadi», dedi Tramp. Prezident bu gapni aytganda Ilon Mask xursandchilikdan sakrab yubordi.
Oq uy saytida ham Trampning so‘zlari paydo bo‘ldi. «Amerika qaytdi. Prezidentlik lavozimimdagi har bir kunda oxirgi nafasim qolguncha siz uchun kurashaman. Amerika farzandlarimiz faxrlanadigan darajada kuchli bo‘lmaguncha charchamayman. Ishoning, Amerika uchun chinakam oltin asr boshlandi», degan Tramp Oq uy e’lon qilgan chiqishda.
