Rossiya hukumati rahbari Miaxil Mishustin O‘zbekistonga tashrif buyuradi

Rossiya Federatsiyasi hukumati raisi, bosh vazir Mixail Mishustin O‘zbekistonga tashrif buyurishni rejalashtirmoqda, dedi Rossiyaning Toshkentdagi favqulodda va muxtor elchisi Oleg Malginov.

«Muhim voqea kutilmoqda – bu bosh vazirning O‘zbekiston Respublikasiga rasmiy tashrifi va hukumat rahbarlari darajasidagi qo‘shma komissiya yig‘ilishidir. Biz hozir, albatta, ushbu tadbirga tayyorgarlik ko‘rmoqdamiz», dedi Malginov «Izvestiya» gazetasida chop etilgan intervyusida. U tashrif sanasiga aniqlik kiritmadi.

Shu bilan birga, Malginov Rossiya prezidenti Vladimir Putin may oyi oxirida O‘zbekistonga tashrif buyurganini esladi – «bu uning birinchi xorijiy safarlaridan biri edi».

«Bu prezidentlar tomonidan kelishilgan loyihalarni amalga oshirish doirasida o‘zaro hamkorlikning yangi yo‘nalishlarini ochib, yangi maqsadlarni belgilab bergan 20 dan ortiq muhim hujjatlar imzolangan juda muhim tashrif bo‘ldi. Ayrim tarmoqlar, vazirliklar, idoralar rahbarlari o‘rtasida doimiy aloqalar mavjud, bu yerda tashriflar almashinuvi juda qizg‘in kechmoqda. Prezidentlar tez-tez muloqot qiladi», dedi Malginov.

Uning so‘zlariga ko‘ra, «ko‘p tomonlama tadbirlar orqali va MDH davlatlari rahbarlarining uchrashuvi doirasida va ehtimol, BRICS a’zo davlatlar rahbarlarining Rossiyadagi uchrashuvi chog‘ida va boshqa kanallar orqali aloqalar rejalashtirilgan». Shu bilan birga, «Rossiya va O‘zbekiston prezidentlari o‘rtasida telefon orqali juda jadal muloqot yo‘lga qo‘yilgan, ular deyarli barcha muhim masalalarni bevosita muhokama qiladi, ular bo‘yicha kelishib oladi va muloqot davom etmoqda».

Rossiya hukumati raisi, bosh vazir Mixail Mishustin so‘nggi bor 2022 yil dekabrida O‘zbekistonga tashrif buyurgan edi.