Toshkentning ikki tumanida giyohvandlik moddasi saqlab kelganlar ushlandi

Poytaxt IIBB xabariga ko‘ra, Uchtepa tumanida yashovchi Sh.N.ning xonadonida tarkibida giyohvandlik moddasi bo‘lgan 2 ta qop, 2 ta sellofan paket, 1 ta gugurt qutisi va 1 ta qog‘oz o‘ramida, shuningdek, yerto‘lada 12 ta 3 litrlik bankada, 6 ta o‘ramda yashil rangli, o‘tkir hidli o‘tsimon moddalar saqlab kelingani aniqlandi. 

To‘plangan hujjatlar tergov bo‘limiga taqdim etilgan.

Shuningdek, Chilonzor tumanida joylashgan sport zalining mas’ul xizmatchisi, 1987 yilda tug‘ilgan Sh.ning yonidan 2 dona polietilen paketga solingan o‘tkir hidli, oq kukunsimon modda topilgan. 

Mashg‘ulotlar zalining dam olish xonasi ko‘zdan kechirilganda 1 dona mumiyosimon modda solingan polietilen paket, elektron tarozi, o‘tkir tig‘li pichoq va ichki qismida jigarrang dog‘lari bo‘lgan yelim idish huquq-tartibot idoralari xodimlari e’tiboridan chetda qolmadi. 

Mazkur holat bo‘yicha to‘plangan hujjatlar tuman IIO FMB Tergov bo‘limiga taqdim etilgan.

Holatlar yuzasidan tergov bo‘limlari tomonidan Jinoyat kodeksining 273-moddasi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek, ularni qonunga xilof ravishda o‘tkazish) 5-qismi bilan jinoyat ishi qo‘zg‘atilib, gumonlanuvchilarga nisbatan qamoqqa olish tarzidagi ehtiyot chorasi qo‘llangan. 

Tergov harakatlari davom etmoqda.