AQSh partiyalari saylov kampaniyasiga qancha pul sarflagani hisoblab chiqildi

AQSh prezidentligiga Demokratik partiyadan nomzod Kamala Harris va sobiq prezident, respublikachi nomzod Donald Tramp saylovoldi kampaniyasi davomida qariyb 14,7 milliard dollar sarfladi. Bu haqda Bloomberg agentligi AQSh Federal saylov komissiyasiga tayanib xabar berdi.

2024 yilgi saylov kampaniyasidagi bunday mablag‘lar nomzodlar, partiyalar va turli siyosiy harakatlar qo‘mitalari tomonidan sarflangan. Ularning soni 11 mingdan oshadi.

Bloomberg ta’kidlaganidek, xarajatlarning katta qismi reklama, shuningdek, «mablag‘ yig‘ishga urinishlar va uyma-uy yurib, targ‘ibot qilish» bilan bog‘liq. Shu bilan birga, bu sohada eng katta sa’y-harakatlar «ikkilanuvchi shtatlarda» qilingan bo‘lib, ekspertlarning fikriga ko‘ra, prezidentlik saylovi natijalarini aynan shular belgilab beradi.

Ta’kidlanishicha, «ikkilanuvchi shtatlar» bo‘lmish Arizona, Jorjiya, Michigan, Nevada, Shimoliy Karolina, Pensilvaniya va Viskonsinda reklama kampaniyalari kuniga 24 soat ishlamoqda. Targ‘ibot plakatlari derazalarga, yo‘llar bo‘ylab osilmoqda, efirni to‘ldirgan televizion reklamalardan tashqari, ayniqsa, ijtimoiy tarmoqlarda raqamli reklamalar ham ko‘paygan.