Saudiya taraqqiyot jamg‘armasi Qirg‘izistonda 38 ta maktab qurib beradi

11 noyabr kuni Ar-Riyodga amaliy tashrif bilan borgan Qirg‘iziston prezidenti Sadir Japarov Saudiya Arabistoni taraqqiyot jamg‘armasi ijrochi direktori Sulton Abdurrohman al-Marshad bilan uchrashdi.

Qirg‘iziston prezidenti matbuot xizmatining ma’lum qilishicha, uchrashuvda Japarov jamg‘armaning turli sohalardagi loyihalarni moliyalashtirishdagi faol ishtiroki uchun minnatdorlik bildirgan. Shuningdek, Qirg‘iziston tarafi davlat ipoteka kompaniyasi doirasida uy-joy qurilishining ikkinchi bosqichini moliyalashtirish hajmini oshirishni taklif qilgan.

Sulton Abdurrohman Al-Marshad fond hamkorlikni kengaytirishga tayyorligini bildirdi. Shuningdek, Saudiya taraqqiyot jamg‘armasi Qirg‘izistonda 38 ta davlat maktabi qurilishi uchun 50 million dollar miqdorida mablag‘ ajratish masalasini ko‘rib chiqishi ta’kidlandi.