Xorazmda o‘quvchining onasi maktabga borib, o‘qituvchi ayolga tashlandi

Xorazm viloyatining Xonqa tumanidagi 36-son umumiy o‘rta ta’lim maktabida o‘quvchining onasi va o‘qituvchi ayol o‘rtasida ziddiyat kelib chiqdi.

Ijtimoiy tarmoqda tarqalgan videoda o‘quvchining onasi maktabga borib, sinfda, o‘quvchilar ko‘z o‘ngida o‘qituvchi ayolga tashlanganini ko‘rish mumkin. Ona o‘qituvchiga qarata «sen nega bolamni urding» degani, o‘qituvchi buni tan olmagani eshitiladi, so‘ngra ikkalasi ham bir-birining sochiga yopishib olgani, o‘quvchilar esa sinfdan qochib chiqqani ko‘rinadi.

Xorazm viloyati Maktabgacha va maktab ta’limi boshqarmasi xabariga ko‘ra, videolavhada aks etgan voqea bundan bir oy muqaddam Xonqa tumanidagi 36-son umumiy o‘rta ta’lim maktabida sodir bo‘lgan va tegishli vakolatli tashkilotlar tomonidan o‘rganilmoqda.

Xorazm viloyati IIBning Kun.uz’ga ma’lum qilishicha, maktab direktori holat yuzasidan 15 noyabr kuni xat bergan. Holat yuzasidan surishtiruv boshlangan.