Sariosiyoda aholi punktiga tog‘dan bo‘rilar galasi tushib keldi

Ijtimoiy tarmoqlarda Sariosiyo tumanida ko‘chalarda bo‘ri galasi yugurib yurgani aks etgan videolavha tarqaldi. Surxondaryo viloyati Ekologiya boshqarmasi holat yuzasidan munosabat bildirdi.

Ma’lum qilinishicha, tarqalgan videolavha 7 dekabr kuni tumanning Marjona mahallasi Zaynobod qishlog‘ida kechki payt tasvirga olingan.

“Sariosiyo tumani tog‘li va tog‘oldi hududlarida havo sovib ketgani sababli yovvoyi hayvonlarning boshqa hududlarga tushib kelish holatlari kuzatilishi mumkin. Bunday holatlarda aholidan ortiqcha vahimaga tushmasliklari, hayvonlarga o‘zboshimchalik bilan zarar bermasligini so‘raymiz”, deyiladi munosabatda.

Boshqarma yovvoyi hayvonlarni ko‘rganda Sariosiyo tumani Ekologiya inspeksiyasi yoki tuman IIBga xabar berish mumkinligini ma’lum qilgan.

Avvalroq ijtimoiy tarmoqlarda Sariosiyo tumanida ko‘chada yo‘lbars yurgani haqidagi xabarlar ham tarqalgandi. Biroq Surxondaryo viloyati Ekologiya boshqarmasi buni rad qildi.