Sariosiyodagi xalqaro ahamiyatga ega ko‘prikka sel zarar yetkazdi, harakat vaqtincha to‘xtatildi

Surxondaryo viloyatining Sariosiyo tumanida joylashgan M-41 «Bishkek–Dushanbe–Termiz» xalqaro avtomobil yo‘lidagi ko‘prik sel oqimi ta’sirida shikastlandi. Hodisa oqibatida mazkur yo‘nalishda transport harakati vaqtincha cheklandi.

Viloyat hokimligiga ko‘ra, 21 iyun kuni soat 20:30-20:45 atrofida tog‘li hududlarda kuzatilgan kuchli yog‘ingarchiliklar natijasida Obizarang daryosida suv sathi keskin ko‘tarilib, sel oqimi yuzaga kelgan.

Sel oqimi Sariosiyo tumani Anorzor mahallasi hududidan o‘tuvchi Obizarang daryosi ustidan o‘tgan ko‘prikka zarar yetkazgan. Inshoot M-41 xalqaro avtomobil yo‘lining 1449-kilometrida joylashgan.

Dastlabki o‘rganishlar davomida ko‘prik konstruksiyalarida shikastlanishlar aniqlangan. Shu munosabat bilan fuqarolar va transport vositalari xavfsizligini ta’minlash maqsadida ko‘prik orqali harakat vaqtincha to‘xtatilgan.

Ma’lum qilinishicha, mazkur ko‘prik 1977 yilda qurilgan bo‘lib, uzunligi 54,7 metrni tashkil etadi. U O‘zbekistonni Tojikiston bilan bog‘lovchi muhim transport yo‘nalishlaridan biri hisoblanadi. Ko‘prik orqali bir soatda o‘rtacha 600-800 ta transport vositasi harakatlanadi.

Mutaxassislarning dastlabki baholashlariga ko‘ra, inshootga yetgan zarar daryoda suv sathi va oqim tezligining keskin ortishi, natijada ko‘prik tayanchlariga yuqori bosim tushishi bilan bog‘liq.

Hozirda transport harakati Uzun tumani hududidagi Do‘stlik, Yangi yo‘l va Qarashiq mahallalari orqali o‘tuvchi aylanma yo‘nalish bo‘yicha tashkil etilgan.

Voqea joyida viloyat va tuman rahbariyati, Avtomobil yo‘llari qo‘mitasi mas’ullari hamda sohaviy mutaxassislardan iborat ishchi guruh faoliyat olib bormoqda. Ayni paytda ko‘prikning texnik holati o‘rganilib, yetkazilgan zarar ko‘lami baholanmoqda va qatnovni tiklash bo‘yicha muhandislik yechimlari ishlab chiqilmoqda.