FT Rossiya va Ukraina 2025 yilda tinchlik shartnomasi tuzishini prognoz qilmoqda

Rossiya 2025 yilda sanksiyalar tahdidi ostida Ukraina bilan tinchlik shartnomasini tuzadi. Bu haqda Financial Times (FT) gazetasining prognozlar jamlanmasida so‘z boradi. Gazetaning hisoblashicha, AQShning yangi saylangan prezidenti Donald Tramp bunga erishish uchun Kiyevga qo‘llab-quvvatlovini kuchaytirishi kerak bo‘ladi.

FT’ga ko‘ra, Ukraina prezidenti Volodimir Zelenskiy Rossiya tomonidan egallangan hududlar ustidan nazoratga «ayrim yerlarni almashish hisobiga yuridik bo‘lmasa ham, faktik jihatdan» rozi bo‘ladi. Buning evaziga u AQSh qo‘llab-quvvatlovida Yevropa xavfsizligi kafolatlarini so‘raydi va Ukrainaning NATOga qo‘shilishi muzatiladi.

Rossiya prezidenti Vladimir Putin jangovar harakatlarni to‘xtatish sharti sifatida Ukraina Qurolli kuchlarini LXR va DXR, shuningdek, Xerson va Zaporojye viloyatlaridan olib chiqib ketilishini talab qilgan. Shuningdek, u Ukraina NATOga qo‘shilishdan voz kechishini talab qilmoqda.

AQSh davlat kotibi Entoni Blinken 19 dekabr kuni Amerikaning MSNBC telekanaliga bergan intervyusida ukrainaliklar «jangni davom ettirish yoki muzokaralar olib borish va o‘t ochishni to‘xtatishga urinish bo‘yicha fundamental qaror qabul qilishi kerak», degandi. Blinkenning so‘zlariga ko‘ra, Qo‘shma Shtatlarning amaldagi rahbariyati Kiyev va AQSh keyingi ma’muriyatini 2025 yilda Kreml bilan potensial tinchlik muzokaralarini boshlash uchun eng yaxshi holatga keltirishni maqsad qilgan.