Germaniya kanslerligiga nomzod Mers AQSh bilan erkin savdo bitimi tuzishga chaqirdi

Yevropa Ittifoqi Qo‘shma Shtatlar bilan erkin savdo kelishuvi bo‘yicha muzokaralarni qayta boshlashi kerak. Bu taklif 2 yanvar, payshanba kuni dpa nashriga bergan sharhida Xristian-demokratik ittifoq (XDI) raisi, Bundestagdagi XDI/XSI fraksiyasi rahbari, Germaniya kansleri lavozimiga nomzod Fridrix Mers tomonidan bildirildi.

«Bizga AQSh va Yevropa iste’molchilariga foyda keltiradigan ijobiy kun tartibi kerak, - dedi Mers. - Yevropa Ittifoqi va AQSh o‘rtasidagi yangi erkin savdo tashabbusi xavfli tarif spiralining oldini olishi mumkin».

XDI rahbari Donald Tramp yangi ma’muriyati Yevropa kompaniyalarining AQSh bozoriga kirishini qiyinlashtirishi va Yevropa Ittifoqi tovarlariga yuqori import bojlari joriy etishi mumkinligidan xavotirda. «Bizning bunga javobimiz bojlarni javoban joriy etishni boshlamaslikdan iborat bo‘lishi kerak», deb ogohlantirdi Mers.

Mers Yevropada Ukraina bo‘yicha aloqa guruhini tuzishga chaqirdi

XDI va XSI muxolifat blokidan Germaniya kansleri lavozimiga nomzod Fridrix Mers AQShda bo‘lajak hokimiyat almashishi munosabati bilan Ukrainaga keyingi yordamni muvofiqlashtirish uchun Yevropa aloqa guruhini shakllantirishni taklif qildi. «Biz Ukraina hech qanday cheklovlarsiz o‘zini himoya qilish huquqidan foydalanishi uchun hamma narsani qilishimiz kerak», dedi u 9 dekabr kuni Kiyevda Ukraina prezidenti Volodimir Zelenskiy bilan uchrashuvda.

Bundan tashqari, yevropaliklar Ukrainadagi urush imkon qadar tezroq tugashi uchun hamma narsani qilishi kerak, deb ta’kidladi Bundestagdagi XDI/XSI fraksiyasi rahbari. Uning so‘zlariga ko‘ra, AQShda Donald Trampning hokimiyat tepasiga kelishiga tayyorgarlik ko‘rish va barcha ehtimoliy ssenariylarni o‘ylab ko‘rish kerak.

Mers fikricha, Yevropaga Germaniya, Fransiya yoki Britaniyaning bir o‘zi ishlab chiqa olmaydigan strategiya kerak. «Biz bu strategiyani faqat birgalikda ishlab chiqishimiz mumkin», deya qo‘shimcha qildi u. Mers, shuningdek, Zelenskiyning Daniya bunday aloqa guruhida muhim rol o‘ynashi mumkinligi haqidagi taklifini «katta qiziqish bilan» qabul qilganini aytdi.