Apple foydalanuvchilar suratlarini ruxsatsiz skanerlayotgani ma’lum bo‘ldi

Apple kompaniyasi o‘z qurilmalariga foydalanuvchi ruxsatisiz uning suratlarini skanerlash imkonini beradigan Enhanced Visual Search funksiyasini joriy etdi, deb xabar bermoqda The Register nashri.

Qayd etilishicha, funksiya 2024 yil 28 oktyabrdan boshlab iOS 18.1 va macOS 15.1 operatsion tizimli qurilmalarida paydo bo‘lgan, ammo Apple foydalanuvchilarga uning ishlashi haqida batafsil ma’lumot bermagan. Standart ravishda o‘rnatilgan ushbu funksiyani sozlamalar orqali o‘chirib qo‘ysa bo‘ladi.

Enhanced Visual Search sun’iy intellekt yordamida fotosuratlarni tahlil qiladi, diqqatga sazovor joylarni aniqlaydi va shifrlangan ma’lumotlarni bazada qidirish uchun Apple serverlariga uzatadi. Shundan so‘ng natijalar foydalanuvchining qurilmasiga qaytariladi va u yerda shifrlanadi.

Apple kompaniyasining ma’lum qilishicha, ma’lumotlar gomomorf shifrlash va differensial maxfiylik mexanizmi yordamida himoyalangan. Bu kompaniyaga turli diqqatga sazovor joylarni aniqlash uchun galereyadagi rasmlarni skanerlash imkonini beradi.

Avvalroq Apple kompaniyasi o‘zining ba’zi qurilmalari foydalanuvchilar suhbatini ruxsatsiz «tinglagani va yozib olgani» haqidagi da’voni hal qilish uchun 95 million dollar to‘lashga rozi bo‘lgandi.