Styuardessaga shilqimlik qilgan erkak 5 sutkaga qamaldi

Samolyot bortida styuardessaga shilqimlik qilgan erkak ma’muriy jazoga tortildi.

Kun.uz o‘rgangan sud qarorida keltirilishicha, holat 2024 yilning 31 dekabr kuni Sochi – Toshkent yo‘nalishida uchib kelgan samolyot bortida kuzatilgan. 1985 yilda tug‘ilgan J.E. ushbu reysda uchib kelayotib, mast holda styuardessaning tanasini ushlab, unga nisbatan shahvoniy shilqimlik qilgan.

J.E. sudda aybiga iqrorlik bildirmagan hamda qo‘lidagi narsasi polga tushib ketganini, uni olayotganda styuardessaga tegib ketganini bildirgan.

Styuardessa esa J.E. mast holda bir necha marotaba uning yonboshiga qo‘li bilan teginib, shilqimlik qilganini aytgan.

“Unga bunday harakatlarni to‘xtatishni so‘rab tanbeh berdim. Biroq J.E. harakatlarini to‘xtatmadi, boshqa yo‘lovchilarga xizmat ko‘rsatishimga to‘sqinlik qilib, menga qo‘pol muomalada bo‘lishda davom etdi. Unga qonuniy chora ko‘rishni so‘rayman”, degan u sudda.

Jinoyat ishlari bo‘yicha Sergeli tuman sudining 2025 yil 7 yanvardagi qaroriga ko‘ra, J.E. MJtKning 41-1-moddasi (shahvoniy shilqimlik qilish) 1-qismida nazarda tutilgan huquqbuzarlikni sodir etgan deb topilgan. Unga 5 sutka ma’muriy qamoq jazosi tayinlangan.

Oldinroq Toshkent viloyatida tish davolatishga kelgan bemor shifokor shilqimligiga uchragani xabar qilingandi.