Farg‘ona viloyati IIB farzandini enaga kaltaklagan onaga munosib ish topib berishni va’da qildi

Kun.uz avvalroq Farg‘ona shahrida yashovchi Muqaddas G‘aniyeva turmushi buzilib muammolar girdobida qolgach ilojsizlikdan 6 yashar o‘g‘li Azizbek va 2 yarim yashar qizi Imronaxonni enagaga topshirib o‘zi Rossiyaga ishlash uchun ketgani, enaga qizaloqni do‘pposlab bosh qismi va tanasiga jiddiy jarohat yetkazgani haqida surishtiruv e’lon qilgandi.

Shundan keyin navoiylik tadbirkor ijtimoiy himoyaga muhtoj oilaga Farg‘ona shahridan uy olib berdi. Shuningdek tadbirkor Muqaddas G‘aniyevaning Rossiyadagi qarzlarini to‘lash bilan bir qatorda onani vatanga qaytib kelishi uchun aviachiptalargacha ta’minladi.

Ma’lum bo‘lishicha, IIB boshlig‘i Muqaddas G‘aniyevaga munosib ish topib berishni va’da qilgan. 

Enagaga nisbatan esa Farg‘ona shahar IIB tergov bo‘limi tomonidan jinoyat ishi qo‘zg‘atilib, hozirda tergov harakatlari olib borilyapti.