Elchi: Isroil Rossiya qurollarini Kiyevga topshirishni rejalashtirmayapti

Isroilning Ukrainadagi elchisi Mixael Brodskiyning aytishicha, uning mamlakati Livanda Isroil mudofaa kuchlari (TSAHAL) tomonidan qo‘lga kiritilgan Rossiya qurollarini Ukraina tomoniga topshirishni rejalashtirmayapti. Diplomat 27 yanvar, dushanba kuni OAVga intervyu berdi.

«Bu Isroil tashabbusi emas, bu yerda qandaydir buzilgan telefon haqida gap ketyapti», — dedi u.

Elchining so‘zlariga ko‘ra, Sharren Xaskel Knesset deputati bo‘lgan vaqtda xususiy qonunchilik tashabbusi bilan chiqqan, biroq u parlamentda qo‘llab-quvvatlanmagan.

Xaskel o‘shandan beri Isroil tashqi ishlar vaziri o‘rinbosari bo‘ldi va shu tariqa xususiy tashabbuslarni ko‘rib chiqish uchun taqdim eta olmaydi, deya qo‘shimcha qildi u.

Diplomat: Isroil Mudofaa vazirligi bunday qarorlar qabul qilmagan

Bunday masalalar butunlay TSAHAL va Isroil Mudofaa vazirligining yurisdiksiyasida, deya aniqlik kiritdi Brodskiy. «Isroil Mudofaa vazirligi birorta ham bunday qarorga kelmagan», — deya ta’kidladi u.

21 yanvar kuni Ukrainaning Tel-Avivdagi elchixonasi o‘zining Facebookʼdagi sahifasida Isroil hukumati Livan yoki boshqa mamlakatlar va mintaqalarda Isroil mudofaa kuchlari tomonidan qo‘lga olingan Rossiyada ishlab chiqarilgan qurollarni Ukrainaga topshirishga tayyorligini bildirdi. Yozuv Ukrainaning Isroildagi elchisi Yevgeniy Korniychuk va Isroil tashqi ishlar vaziri o‘rinbosari Xaskel o‘rtasidagi uchrashuvdan keyin paydo bo‘lgan.

Avvalroq Korniychuk Rossiyaning keng ko‘lamli hujumidan himoyalanayotgan Ukraina Livan va G‘azo sektorida Isroil armiyasi tomonidan qo‘lga olingan Rossiyada ishlab chiqarilgan qurollarni olishga umid qilayotganini ma’lum qilgandi.