O‘zbekiston | 17:28 / 29.01.2025
2846
3 daqiqa o‘qiladi

Tojikiston va Qirg‘izistonda olib kelingan narkotik moddalar savdosiga chek qo‘yildi

Xususan, Toshkent-Namangan yo‘nalishida harakatlanayotgan Damas rusumli avtomashina to‘xtatilib, ko‘zdan kechirilganda uning salon qismiga yashirib qo‘yilgan 2 kg 436 gr gashish moddasi aniqlangan.

Foto: Videodan kadr

Huquqni muhofaza qiluvchi organlar tomonidan o‘tkazilgan tezkor tadbirlar davomida O‘zbekiston hududiga qo‘shni davlatlardan olib kelingan qariyb 8 kilogramm narkotik moddalar savdosiga chek qo‘yildi.

Xususan, Surxondaryo viloyatining Denov tumanida yashovchi fuqaro va uning Termiz shahrida istiqomat qiluvchi jinoiy sherigi 3 kilogramm 849 gramm opiy moddasini Samarqand viloyatiga sotish maqsadida olib kelgan vaqtida ashyoviy dalillar bilan ushlangan. Tergovga qadar tekshiruv davomida aniqlanishicha, ushbu giyohvandlik vositasi muqaddam tojikistonlik narkokurer tomonidan Denov tumani hududiga kontrabanda yo‘li bilan yetkazib berilgan.

Namangan viloyatining Pop tumanida o‘tkazilgan tezkor tadbirda Toshkent—Namangan yo‘nalishida harakatlanayotgan, Chust tumanida yashovchi shaxs boshqaruvidagi Damas rusumli avtomashina to‘xtatilib, ko‘zdan kechirilgan. Natijada uning salon qismiga yashirib qo‘yilgan 2 kilogramm 436 gramm gashish moddasi aniqlanib, protsessual tartibda rasmiylashtirib olingan. Ma’lum bo‘lishicha, u muqaddam tojikistonlik narkokurerlar tomonidan aylanma yo‘llar orqali Toshkent viloyatining Ohangaron tumani hududiga olib kelinib, xufiya joyga qoldirib ketilgan ushbu giyohvandlik vositasini olib qaytayotgan bo‘lgan.

Boshqa holatda esa Namangan—Andijon yo‘nalishida harakatlangan Cobalt rusumli avtomashina Andijon shahrida to‘xtatilib, ko‘zdan kechirilganda, unda yo‘lovchi sifatida ketayotgan Qirg‘iziston fuqarosi, muqaddam giyohvandlik vositalari savdosi bilan bog‘liq jinoyati uchun sudlangan shaxsga tegishli 1 kilogramm 702 gramm gashish moddasi borligi aniqlanib, protsessual tartibda rasmiylashtirib olingan.

Tergovga qadar tekshiruv davomida u Qirg‘izistondan kontrabanda yo‘li bilan Namangan viloyatiga olib kelgan ushbu narkotik moddani Andijon shahrida sotishni rejalashtirgani ma’lum bo‘lgan.

Hozirda mazkur shaxslarga nisbatan Jinoyat kodeksining tegishli moddalari bilan jinoyat ishlari qo‘zg‘atilib, qamoq ehtiyot chorasi qo‘llangan.

Mavzuga oid