Latviyada og‘ir kasallikka chalingan O‘zbekiston fuqarosi vatanga qaytarildi

Latviyaga ishlash maqsadida borgan va og‘ir kasallikka chalingan O‘zbekiston fuqarosi elchixona xodimlari ko‘magida vatanga qaytarildi.

Qayd etilishicha, o‘zbekistonlik M.V. o‘tgan yili ishlash maqsadida Riga shahriga borgan. Ammo sog‘lig‘ida kuzatilgan muammolar sababli shu yil yanvar oyi o‘rtalarida Riga shahridagi shifoxonalardan biriga davolanish maqsadida joylashtirilgan.

Shundan so‘ng, u O‘zbekiston elchixonasiga murojaat qilib, vatanga qaytish va shifoxona bilan yuzaga kelgan muammolarni hal etishda amaliy yordam so‘ragan.

Diplomatlar shifoxona mas’ullari bilan uchrashuv o‘tkazib, barcha muammolarni hal etish bo‘yicha kelishib olgan. Shuningdek, fuqaroning O‘zbekistonga qaytishi bilan bog‘liq hujjatlarni rasmiylashtirishda amaliy yordam ko‘rsatilgan.

«Bemorning davolanishi va vatanga qaytishi bilan bog‘liq xarajatlar mamlakatimiz elchixonasi hamda Xalqaro migratsiya tashkiloti Riga ofisi ko‘magida ijobiy hal etildi. Yurtdoshimiz Uzbekistan Airways milliy aviakompaniyasining Riga—Toshkent yo‘nalishidagi samolyoti bilan O‘zbekistonga kuzatib qo‘yildi», — deyiladi xabarda.

Bundan oldin Xitoyda murakkab vaziyatga tushib qolgan O‘zbekiston fuqarolari, shuningdek, Turkiyada qarovsiz qolgan o‘zbekistonlik bolalar vatanga qaytarilgani to‘g‘risida xabar berilgandi.