Kiyev Myunxendagi MCS'da Rossiya bilan uchrashish imkoniyatini rad etdi

«Myunxenda ruslar bilan muzokaralar bo‘lmaydi», dedi Zelenskiyning maslahatchisi. Tramp u yerda Moskva, Kiyev va Vashingtondan kelgan «yuqori amaldorlar» ishtirokida uchrashuv bo‘lib o‘tishini aytgandi.

Foto: picture alliance / photothek

AQSh prezidenti Donald Tramp 14 fevral kuni Myunxen xavfsizlik konferensiyasi (MCS) ochiladigan Myunxenda Moskva, Kiyev va Vashingtonning «yuqori amaldorlari» uchrashuv o‘tkazishini e’lon qildi. Tramp 13 fevral, payshanba kuni Oq uyning Oval kabinetida jurnalistlar bilan suhbatlashdi. Ukrainada bunday aloqalar ehtimoli rad etildi.

«Ertaga Myunxenda uchrashuv bo‘lib o‘tadi. Rossiya u yerda bizning odamlarimiz bilan birga bo‘ladi. Ukraina ham taklif etilgan... Har bir davlatdan kimlar bo‘lishini aniq bilmayman, lekin Rossiya, Ukraina va AQShdan yuqori martabali odamlar bo‘ladi», — deya AQSh prezidentining so‘zlarini keltiradi AFP.

Reuters ham Trampga tayanib, AQSh va Rossiya rasmiylari Myunxenda uchrashishi va Ukraina taklif qilingani haqida xabar berdi.

Zelenskiyning maslahatchisi: Rossiyaliklar bilan bo‘sh stolda uchrashuv bo‘lmaydi

Ayni paytda Ukraina prezidentining aloqalar bo‘yicha maslahatchisi Dmitriy Litvin bunday muzokaralar o‘tkazish imkoniyatini rad etdi.

«Ukraina pozitsiyasi o‘zgarmadi. Ukraina birinchi navbatda Amerika bilan gaplashishi kerak. Yevropa haqiqiy va mustahkam tinchlik uchun har qanday jiddiy suhbatning ishtirokchisi bo‘lishi kerak», — deya Litvin so‘zlarini keltiradi RBK-Ukraina.

Ukraina rasmiysiga ko‘ra, «ruslar bilan muzokaralar stolida faqat kelishilgan umumiy pozitsiya bo‘lishi kerak».

«Rossiyaliklar bilan bo‘sh stolda uchrashuv bo‘lmaydi. Hozir stolda hech narsa yo‘q. Myunxenda rossiyaliklar bilan muloqot kutilmayapti», — deya ta’kidladi Litvin.