Avstriyada Suriya fuqarosi pichoq bilan odamlarga hujum qildi

Avstriya janubidagi Fillax shahrida yuz bergan qurolli hujum oqibatida bir kishi halok bo‘ldi va besh kishi jarohat oldi, deb yozadi BBC News.

Avstriya politsiyasi ma’lumotlariga ko‘ra, 15 fevral kuni shahar markaziy maydonida noma’lum shaxs pichoq bilan odamlarga hujum qilgan. Hodisa oqibatida 14 yoshli o‘smir halok bo‘lgan. Shuningdek, 14-32 yosh oralig‘idagi besh kishi ham yaralangan bo‘lib, ularning ikki nafari og‘ir ahvolda.

Jinoyatni sodir etishda gumonlangan shaxs politsiya tomonidan qo‘lga olingan. Aniqlanishicha, u 23 yoshli suriyalik qochoq bo‘lib, Avstriyadan siyosiy boshpana so‘ragan va mamlakatda yashash huquqini beruvchi ruxsatnomaga ega. Yigit nima sababdan bunday jinoyatga qo‘l urgani noma’lum.

Hujum qilgan shaxsni jinoyatga guvoh bo‘lgan kurer ushlashga yordam bergan. Asli suriyalik bo‘lgan ushbu fuqaro yangi hujumning oldini olish maqsadida mashinasi bilan jinoyatchini turtib yuborgan.

OAVga ko‘ra, gumonlanuvchi politsiya tomonidan qo‘lga olingan vaqtda skameykada yuzida tabassum bilan o‘tirgan holatda bo‘lgan.

Avvalroq Myunxenda namoyishchilarni avtomobil bosib ketilgani to‘g‘risida xabar berilgandi. Hodisa oqibatida kamida 28 kishi jabrlangan. Bavariya bosh vaziriga ko‘ra, bu maqsadli hujum bo‘lgani taxmin qilinmoqda.