Immigratsiyani taqiqlash Yevropa aholisining 30 foizdan ortiqqa qisqarishiga olib keladi

Yevropa Ittifoqi aholisi 2100 yilga borib taxminan 6 foizga qisqarib, 447 million kishini tashkil etadi. Ammo bu immigratsiyani inobatga olgan holdagi bazaviy ssenariy bo‘lib, u taqiqlangudek bo‘lsa, YeI aholisi 30 foizdan ortiqqa qisqarishi mumkin. Bu haqda Eurostat va unga asoslangan o‘z hisob-kitoblariga tayanib, The Guardian xabar berdi.

Qayd etilishicha, birinchi ssenariyda Buyuk Britaniyaning hozirda 68 millionga teng aholisi 86 millionga qadar oshadi, ikkinchi holatda — 48 million kishigacha qisqaradi. Germaniyada immigratsiya saqlanib qolsa, aholi soni biroz oshadi — hozirgi 83 milliondan 84 milliongacha, immigratsiya taqiqlansa — 53 million kishi qoladi.

Har qanday holatda ham Yevropadagi aksariyat davatlarning aholisi 2100 yilga borib qisqaradi, ammo turli darajada: Italiya aholisi immigratsiya saqlanib qolsa hozirda 59 milliondan 50 million kishigacha tushadi, u bo‘lmasa — 28 million kishi tashkil etadi.

«O‘ng va so‘l markaz siyosatchilarining aksariyati demografik bosimni yumshatish uchun immigratsiya zarurligini tan oladi. Ammo radikal o‘ng partiyalar bu hukmron konsensusga tobora ko‘proq e’tiroz bildirmoqda. Mehnatga layoqatli immigratsiyani kamaytirish bosimiga qarshi tura oladigan davlatlar uzoq muddatda kuchliroq iqtisodiy mavqega ega bo‘ladi», — deydi Centre for European Reform tadqiqot markazi tahlilchisi Jon Springford.