AQSh birinchi marta BMTning Ukraina bo‘yicha Rossiyaga qarshi rezolyutsiyasini qo‘llab-quvvatlamadi

AQSh Ukrainada jangovar harakatlar boshlanganidan beri birinchi marta BMT Bosh assambleyasining Rossiya harakatlarini qoralovchi rezolyutsiyasini imzolashdan bosh tortdi. Bu haqda uch nafar diplomatik manbasiga tayanib Reuters xabar berdi.

Qayd etilishicha, hujjatni imzolagan davlatlar orasida harbiy harakatlarning uch yilligi munosabati bilan rezolyutsiya tayyorlagan 50 dan ortiq davlat vakillari bor.

«O‘tgan yillar davomida Qo‘shma Shtatlar Ukrainada adolatli tinchlik o‘rnatilishini qo‘llab-quvvatlovchi shunga o‘xshash rezolyutsiyalarni doimiy ravishda qo‘llab-quvvatlab kelgan», — deydi agentlik suhbatdoshlaridan biri. Ta’kidlanishicha, BMTdagi ovoz berish jarayonlari hamon AQSh ko‘magisiz o‘tishi, biroq keng ko‘lamda qo‘llab-quvvatlanmasligi mumkin.

Rezolyutsiya matnida mualliflar «xalqaro hamjamiyat tomonidan tan olingan chegaralar doirasida Ukrainaning suvereniteti, mustaqilligi, birligi va hududiy yaxlitligiga sodiqliklarini» yana bir bor tasdiqlagan. Hujjatda «deeskalatsiya, jangovar harakatlarni tezroq to‘xtatish va mojaroni tinch yo‘l bilan hal etish»ga chaqiruvlar keltirilgan.

2022 yil 24 fevraldan beri BMT Bosh assambleyasi Rossiya—Ukraina mojarosiga bag‘ishlangan Favqulodda maxsus sessiya yig‘ilishlarini bir necha bor o‘tkazgan. Bugunga qadar Ukrainani qo‘llab-quvvatlash bo‘yicha oltita rezolyutsiya qabul qilingan. AQSh Buyuk Britaniya, Fransiya, Germaniya, Polsha, Estoniya, Latviya, Litva va boshqa G‘arb davlatlari bilan ushbu hujjatlarning hammuallifi hisoblanadi.

Avvalroq Trampning Ukraina prezidentini «diktator» degan da’vosi Birlashgan Millatlar Tashkilotida keskin tanqidlarga sabab bo‘lgandi. Germaniya kansleri Amerika yetakchisining so‘zlarini noto‘g‘ri va xavfli deb atagan.