Ilon Mask Ukraina Starlink tizimidan uzib qo‘yilishi mumkinligi haqidagi xabarlarni rad etdi

Amerikalik milliarder va SpaceX kompaniyasi asoschisi Ilon Mask Ukraina uchun Starlink sun’iy yo‘ldosh aloqa tizimi o‘chirib qo‘yilishi mumkinligi haqidagi xabarlarni rad etdi. Reuters agentligi avvalroq AQSh Ukrainaga Starlink sun’iy yo‘ldosh internetini yopib qo‘yish bilan tahdid qilayotgani to‘g‘risida xabar bergandi.

«Bu yolg‘on. Reuters yolg‘on ma’lumot tarqatmoqda. U eski OAV orasida yolg‘on tarqatadigalar qatorida Associated Press’dan keyingi ikkinchi o‘rinda turadi», — deb yozadi Ilon Mask o‘zining X ijtimoiy tarmog‘iga.

Reuters agentligi o‘z manbasiga tayanib, Vashington foydali qazilmalar borasida kelishuvga erishilmasa, Kiyevga bosim o‘tkazish maqsadida Starlink sun’iy yo‘ldosh internet tizimini o‘chirib qo‘yish variantini ko‘rib chiqayotganini yozgandi.

Ukraina Milliy xavfsizlik va mudofaa kengashi qoshidagi dezinformatsiyaga qarshi kurash markazi rahbari Andrey Kovalenkoga ko‘ra, Ukrainaga Starlink sun’iy yo‘ldosh internetini yopib qo‘yilsa ham bu harbiylar uchun falokat bo‘lmaydi.

Starlink sun’iy yo‘ldosh aloqa tizimi — SpaceX kompaniyasi loyihasi hisoblanadi. Ukrainada u 2022 yildan beri ishlamoqda. Tarmoq keng ko‘lamli internetdan foydalanish imkoniyatini taqdim etishga mo‘ljallangan, jumladan, Ukraina Qurolli kuchlari uchun ham. 2025 yil oxirlarida Starlink Ukrainada uyali aloqa xizmatlarini ham taqdim etishni boshlashi kutilmoqda.