Farg‘onada kompyuter klubi xodimlarini kaltaklaganlar qamoqqa olindi

Farg‘ona shahridagi “Verona” kompyuter klubida janjal ko‘targan shaxslar javobgarlikka tortildi. Holat yuzasidan Farg‘ona viloyati IIB axborot xizmati munosabat bildirdi. 

Ma’lum qilinishicha, joriy yilning 21 fevral kuni Farg‘ona shahar Oftob ko‘chasida joylashgan kompyuter o‘yinlari klubida yetti nafar tanishlar o‘zaro baqir-chaqir qilib kompyuter o‘ynashgan. Klub ish boshqaruvchisi F.Xudoynazarov tomonidan ularga e’tiroz bildirilgan. Oqibatda o‘zaro kelishmovchilik sababli fuqaro O.Vallomov uning yuz qismiga urib yuborgan va janjalga uning sheriklari ham qo‘shilishgan.

Hozirda mazkur holat yuzasidan Jinoyat kodeksining 277-moddasi 3-qismi “g” bandi (jamoat tartibini saqlash vazifasini bajarib turgan hokimiyat vakili yoki jamoatchilik vakiliga yoxud bezorilik harakatlarining oldini olish chorasini ko‘rgan boshqa fuqarolarga qarshilik ko‘rsatib, bezorilik qilish) bilan jinoyat ishi qo‘zg‘atilgan. Gumonlanuvchilar O.Vallomov, M.Qodirov hamda N.Mahmudjonovga nisbatan qamoqqa olish tarzidagi ehtiyot chorasi qo‘llangan.

Shunigdek, ularning yana uch nafar sherigiga nisbatan ma’muriy tartibda bayonnoma rasmiylashtirilgan.

“Mazkur holat viloyat IIB tomonidan nazoratga olingan. Yakuniga ko‘ra qonun ustuvorligi, jazo muqarrarligi ta’minlanadi”, deyiladi munosabatda.

Kun.uz oldinroq Otabek Vallomov va uning sheriklari kompyuter klubi xodimlarini kaltaklagani haqida xabar bergandi. Kun.uzʼga kelib tushgan video-dalillarda ko‘rinishicha, klubda kompyuter o‘ynab o‘tirgan yigitlar dastlab shovqin solib, boshqalarga xalaqit qilishgan. Shundan so‘ng kompyuter klubi xodimlari kelib, shovqin solmaslikni so‘ragan. Shovqin to‘xtamagach, yigitlarni kompyuterni o‘chirib qo‘yish bilan ogohlantirishgan. Shundan so‘ng gap talashishlar mushtlashuvga aylangan.

Klubdagi shovqin-suron va fuqarolarni kaltaklashni boshlagan yigit o‘zining “Otabek Vallomov” ekanini aytib, kerak bo‘lsa klubni sotib olishini bildirgan. U “xohlagan odamingni boshlab kel”, deb baqirgan.