Isroil va Hamas garovga olingan 4 kishining jasadini qaytarishga kelishib oldi

Isroil va Hamas harakati Isroil tomoniga garovga olingan yana to‘rt kishining jasadini topshirish va bir vaqtning o‘zida 602 nafar falastinlik mahbusni ozod qilishga kelishib oldi. Bu haqda 25 fevral, seshanba kuni Hamas guruhi xabar berdi. Shu kuni isroillik ismini oshkor etilmagan amaldor The Times of Israel internet nashri bilan suhbatda ma’lumotni tasdiqladi.

Nashr manbasining ta’kidlashicha, garovga olinganlarning jasadlarini topshirish 26 fevral kuni Misr vositachiligida amalga oshiriladi.

Falastinlik mahbuslarni ozod qilish kechiktirilgan

Avvalroq, 23 fevral kuni Isroil bosh vaziri Binyamin Netanyahu G‘azo sektorida o‘t ochishni to‘xtatish kelishuvi doirasida 22 fevralga belgilangan 600 dan ortiq falastinlik mahbusni ozod qilish, Hamas guruhi isroilliklarni garovga olganlarni topshirish chog‘ida o‘tkazayotgan «tahqirlash marosimlarini» to‘xtatmaguncha kechiktirilishini ma’lum qilgandi.

22 fevral kuni Hamas yana olti nafar isroillik garovga olinganlarni ozod qildi va o‘z tomonida kelishuvning birinchi bosqichi yakunlanganini e’lon qildi. Isroil shu kuni 602 falastinlik mahbusni qamoqdan ozod qilishi kerak edi. Kechqurun Hamas ularni ozod qilish kechikayotgani haqida xabar berib, Isroilni o‘t ochishni to‘xtatish kelishuvini «qo‘pol ravishda buzganlikda» aybladi.

2 martga qadar davom etadigan birinchi bosqich doirasida jami 25 nafar isroillik ozod etilishi, sakkiz nafarining jasadi topshirilishi kerak.