«Tramp sizning yagona ittifoqchingiz» – Vens ham Isroilni tanqid qildi

Oq uydagi matbuot anjumanida AQSh vitse-prezidenti Jyey Di Vensdan Isroil bosh vaziri Binyamin Netanyahuning Eron bilan kelishuvdan g‘azabda ekani haqida so‘rashdi. Vens Netanyahudan bunday izohlarni eshitmaganini aytdi, biroq Isroil hukumati a’zolarining AQSh-Eron kelishuvga va shaxsan Trampga hujumlarini tanqid qildi.

«Men [AQSh-Eron] bitimini barbod qilishi mumkin bo‘lgan taxminiy ssenariylarga kirishmoqchi emasman. Chunki, prezident Trampning kutilmasi shuki, isroilliklar va mintaqadagi arablarning barchasi hamkorlikda ish tutib, ushbu bitimni oxiriga yetkazadi.

Axios xabarini ko‘rdim: Netanyahu g‘azabda emish. Bu xabar men u bilan olib borgan suhbatlarni aks ettirmaydi. Balki u menga aytmagan narsalarni boshqalarga aytayotgandir.

Meni haqiqatan ham tashvishga soladigani boshqa: Bibi kabinetidagi ba’zi a’zolar bitimni ochiqdan-ochiq tanqid qilganini, ba’zi hollarda esa ular AQSh prezidentini shaxsan haqorat qilganini ko‘rdingiz.

Ularga ikki xil xabar bermoqchiman:

Birinchidan, Donald Tramp — hozirgi damda butun dunyoda Isroil davlatiga hamdard bo‘lgan yagona davlat rahbari. Qolaversa, u dunyodagi yagona o‘ta qudratli davlatining rahbari hamdir. Agar men Isroil hukumatida bo‘lsam, dunyoda qolgan yagona kuchli ittifoqdoshimni «nishonga» olmasdim».

US Vice President JD Vance lashed out at Israeli critics of the Iran deal, saying Trump is Israel's 'only powerful' ally, in a sharp rebuke that referenced the billions in US defense aid the country receives https://t.co/83ZRLgPIxG pic.twitter.com/cbOfckihTi

— Reuters (@Reuters) June 18, 2026

U shuningdek, Isroilni himoya qilgan mudofaa qurollarining uchdan ikki qismi «Amerikaga tegishli» ekanini eslatib o‘tdi.

«Ikkinchi xabarim, Bibining o‘zi bu yo‘lga kirmadi. Ammo prezident Trampni hujumga olgan Isroildagi ba’zi hukumat a’zolariga shuni aytardimki, so‘nggi uch oy ichida yurtingizni himoya qilgan mudofaa qurollarining uchdan ikki qismi Amerika qo‘llari bilan yaratilgan va Amerika soliq to‘lovchilarining pullari hisobiga to‘langan.

Isroilning muammosi – Donald Tramp emas. O‘z mamlakatining eng katta muammosi AQSh prezidenti deb o‘ylaydigan har bir isroillik ko‘zini ochib, mamlakatning haqiqiy ahvolini ko‘rsin» degan AQSh vitse-prezidenti Oq uydagi tadbirda.

Reutersʼning yozishicha, Qo‘shma Shtatlar Isroilga yiliga taxminan 4 milliard dollar harbiy yordam ko‘rsatadi. Ikki davlat hozirda yangi yordam bitimi bo‘yicha muzokaralar olib bormoqda.

Netanyahu idorasi va Isroil tashqi ishlar vazirligi Vensning so‘zlariga izoh bermadi.

AQSh va Isroil o‘rtasidagi keskinlik kuchaymoqda

Isroillik yuqori martabali mulozimlar AQSh-Eron kelishuvining shartlari Isroil uchun yomon ekanligini aytib kelmoqda. Ularning ta’kidlashicha, bu fikr Isroil rahbariyati o‘rtasida umumiy qarash hisoblanadi.

Tramp chorshanba kuni Katta yettilik (G7) sammitidagi nutqida Isroilning xavotirlarini yumshatishga harakat qildi. Trampning aytishicha, Netanyahu Livandagi Hizbullohga qarshi kurashda «yumshoqroq yondashuvdan» foydalanishi mumkin.

Kelishuv tuzilganidan keyingi ilk izohida Netanyahu Isroil AQSh bilan munosabatlarini qadrlashini aytdi. Biroq u Isroil shimoliy chegarasi yaqinida Janubiy Livan okkupatsiyasini davom ettirmoqchi.

«Bu Janubiy Livandagi xavfsizlik zonasini saqlab qolishni talab qiladi; Isroilning xavfsizlik ehtiyojlari talab qilar ekan, biz u yerni tark etmasligimizni taqozo etadi», dedi Netanyahu.

Isroil payshanba kuni Janubiy Livanda kengaytirilgan harbiy nazorat zonasini ko‘rsatuvchi xaritani e’lon qildi. Shuningdek, u AQSh-Eron kelishuvi shartlariga qarshi chiqqan holda, ushbu zonadan tashqarida ham hujumlar uyushtirishini istisno qilmadi.