OpenAI yangi sun’iy intellekt GPT-4.5 modelini taqdim etdi. U kodlarni yaxshiroq yozadi

Amerikaning OpenAI kompaniyasi sun’iy intellektning yangi GPT-4.5 modelini taqdim etdi. Bu haqda kompaniya blogida ma’lum qilindi.

OpenAI’ning qayd etishicha, yangi versiya foydalanuvchining nozik ishoralarini ham yaxshi tushunadi hamda ularga javob qaytaradi — u yozish yoki dasturlashda foydali bo‘lishi mumkin. Kompaniyadagilar GPT-4.5 oldingi modeldan kamroq xato qilishini kutmoqda.

Kompaniya ichida Orion deb atalayotgan modelning dastlabki versiyasidan hozirda dasturiy ta’minot ustida ish olib borgan guruh va ChaGPT Pro obunachilari foydalana oladi.

OpenAI’ning tadqiqotlar bo‘yicha vitse-prezidenti Nik Rayderning ma’lum qilishicha, yangi modelning imkoniyatlari 2023 yil boshida GPT-3.5ʼdan GPT-4ʼga o‘tilganda bo‘lgani kabi joriy top modelga nisbatan yaxshilanishi kutilmoqda.

Bloomberg agentligi 2024 yilda OpenAI kompaniyasi Orion modelini ishlab chiqishda qiyinchiliklarga duch kelgani haqida yozgandi. Manbalarning so‘zlariga ko‘ra, Orion o‘ziga o‘rgatilmagan dasturlash mashqlarini uddalay olmagan. Shuningdek, kompaniya yanada takomillashgan sun’iy intellekt tizimlarini yaratishda zarur bo‘ladigan yangi, foydalanilmagan manbalarni qidirishda qiyinchilikka uchragan.

Avvalroq OpenAI sun’iy intellekt modellarini o‘qitish siyosatiga o‘zgartirishlar kiritgandi. Bu munozarali mavzularga yanada xolis yondashuvni ta’minlash maqsadida amalga oshirilgan. Endi ChatGPT ilgari “taqiqlangan” savollarni ham muhokama qila oladi.