Londonda Ukraina bo‘yicha sammit boshlandi

Londonda Yevropa yetakchilarining Ukrainani qo‘llab-quvvatlashni davom ettirish masalalari bo‘yicha sammiti boshlandi, deb xabar beradi Bild. Sammit ishtirokchilarini Buyuk Britaniya bosh vaziri Kir Starmerning shaxsan o‘zi kutib olmoqda.

Ayni vaqtga qadar sammitda ishtirok etish uchun NATO bosh kotibi Mark Ryutte, Germaniya kansleri Olaf Shols, Fransiya prezidenti Emmanuel Makron, Finlandiya prezidenti Aleksandr Stubb, Polsha bosh vaziri Donald Tusk, Ukraina prezidenti Volodimir Zelenskiy, Ukrainaning Buyuk Britaniyadagi elchisi Valeriy Zalujniy yetib keldi.

Sammitda ko‘tariladigan asosiy mavzulardan biri Yevropaning yadroviy xavfsizligi bo‘ladi. Makron yadroviy qurolga ega bo‘lmagan Yevropa davlatlari bilan «strategik dialog»ni qo‘llab-quvvatlashini ma’lum qilgan.

«Bizda yadroviy qalqon bor, ularda — yo‘q. Ular endi AQShning yadroviy tutib turish kuchlariga umid qila olmaydi», — deydi Fransiya prezidenti.

Muzokaralarning yana bir mavzusi — AQShning Yevropa xavfsizligidagi roli. Oq uyda yuz bergan bahsga qaramay, Starmer Donald Trampning Britaniyaga taklifini kuchda qoldirgan. Starmerning ta’kidlashicha, eng muhimi — ichki siyosiy kelishmovchilikka qaramay, Yevropada tinchlik masalasini muhokama qilishdir.

Sammit boshlanishidan oldin Zelenskiy va Meloni urushni tugatish bo‘yicha qo‘shma harakatlar rejasini muhokama qildi. «Ukrainaga ishonchli xavfsizlik kafolatlari bilan mustahkamlangan tinchlik kerak», — dedi Ukraina prezidenti Italiya bosh vaziri bilan uchrashuvda.