Pistorius: AQShning Kiyevga to‘xtatilgan yordamini qoplab beramiz

Germaniya va Ukrainani qo‘llab-quvvatlovchi boshqa davlatlar, Germaniya mudofaa vaziri Boris Pistoriusning so‘zlariga ko‘ra, AQShdan yetishmayotgan yordamni katta darajada qoplash niyatida. «Biz, albatta, Amerika ko‘magini yangi yordam choralari orqali, hech bo‘lmaganda sezilarli darajada qoplashga intilamiz», dedi Pistorius 6 mart, payshanba kuni Ukraina mudofaa vaziri Rustem Umerovning Berlinga tashrifi chog‘ida. Xususan, u Kiyevga artilleriya snaryadlari va Amerikaning Starlink sun’iy yo‘ldosh tarmog‘i kabi aloqa vositalarini va’da qildi.

Pistorius Qo‘shma Shtatlarni Ukrainaga harbiy yordamni «bir kechada» to‘xtatib qo‘ygani uchun tanqid qildi. Shu bilan birga, u Germaniya «Ukraina tomonida qolayotganini va bu hozir har qachongidan ham muhimroq» ekanini ta’kidladi. Germaniya mudofaa vaziri, shuningdek, Berlin Ukrainaning havo hujumidan mudofaa va quruqlikdagi kuchlarini mustahkamlashga e’tibor qaratishda davom etishini ta’kidladi.

Uning ta’kidlashicha, nemis ta’minoti «doimiy va ishonchli» amalga oshirilmoqda. «Agar biror narsani e’lon qilsak va unga mablag‘ ajratsak, u yetkazib beriladi», deb ishontirdi Pistorius. Shu munosabat bilan u Germaniyadagi bo‘lajak hukmron koalitsiyadagi istiqbolli hamkorlar — xristian partiyalar bloki XDI/XSI va sotsial-demokratlar o‘rtasidagi kelishuvni esladi, unga ko‘ra yalpi ichki mahsulotning 1 foizidan ortiq bo‘lgan barcha mudofaa xarajatlari qarz olish bo‘yicha budjet chegarasiga («qarz tormozi» deb ataladi) bo‘ysunmaydi. Bu amalda Bundesverni moliyalashtirish uchun cheksiz kreditlarni anglatadi.

Yevropa hamkorlari bilan kelishilgan holda

Boris Pistoriusning so‘zlariga ko‘ra, Germaniya Ukraina uchun «hal qiluvchi pallada» Yevropadagi hamkorlari bilan o‘z harakatlarini yaqindan muvofiqlashtirmoqda. Amerikaning yetishmayotgan yordamini qoplash choralarini kelishib olish uchun Pistorius britaniyalik hamkasbi Jon Xili bilan birgalikda Ukraina bo‘yicha aloqa guruhini boshqarishda davom etishga kelishib oldi. Keyingi uchrashuv rejalashtirish bosqichida.

«Biz Ukrainani faol qo‘llab-quvvatlashda davom etamiz, shunda u hatto mana shunday og‘ir damlarda ham o‘z kuchini saqlab qolishi va shu pozitsiyadan turib harakat qilishi mumkin», — deya ta’kidladi Pistorius.

O‘z navbatida, Ukraina mudofaa vaziri Rustem Umerov Germaniya allaqachon o‘z mamlakatiga 20 milliard yevro miqdorida harbiy yordam berganini ta’kidladi. Bu Yevropa yordamining 37 foizini va barcha mamlakatlardan kelgan harbiy yordamning 16 foizini tashkil qiladi. Umerov Germaniyaning yordami, ayniqsa, Ukrainani havo hujumlaridan himoya qilish uchun muhim ahamiyatga ega ekanligini ta’kidladi.