430 tonna Ai-80 benzinini noqonuniy ravishda sotib yuborgan MChJ aniqlandi

Buxoro viloyatida 430,7 tonna Ai-80 markali avtobenzinni noqonuniy ravishda ulgurji sotib yuborgan MChJ aniqlandi.

Foto: O‘zenergoinspeksiya

«O‘zenergoinspeksiya» Buxoro viloyat hududiy boshqarmasi tomonidan o‘tkazilgan nazorat tadbirida Kogon tumani «O‘ba cho‘li» MFYda joylashgan «N.P.» MChJga qarashli avtomobillarga yonilg‘i quyish shoxobchasida neft mahsulotlari sotuvga chiqarilishi bo‘yicha noqonuniy holat aniqlandi.

Xususan, «N.P.» MChJga qarashli avtomobillarga yonilg‘i quyish shoxobchasi ish faoliyatida bo‘lmasa-da, «Buxoro neft bazasi» MChJdan jami 430,7 tonna (3,7 mlrd so‘mlik) AI-80 markali avtobenzinni shoxobcha sig‘imlariga tushirilmasdan avtosisterna orqali ulgurji sotib yuborilganligi aniqlandi.

Mazkur holat yuzasidan qoidabuzarlikka yo‘l qo‘ygan ushbu AYoQShning birja savdolarida ishtirok etishi vaqtincha to‘xtatildi.