Polshada O‘zbekiston fuqarolarining ichki a’zolarini sotish bilan shug‘ullangan shaxs qo‘lga olindi

Polshalik chegarachilar inson organlari savdosi bilan shug‘ullangan jinoiy guruhning 35 yoshli ukrainalik a’zosini qo‘lga oldi.

Qayd etilishicha, Qozog‘istonda ushbu ayol sirtdan 12 yil muddatga qamoq jazosiga hukm qilingan. Ayblov versiyasiga ko‘ra, u «qora bozor»da 56 dona inson buyragining sotilishini tashkillashtirgan.

Polshaning Pshemisl shahri prokuraturasi matbuot xizmatining ma’lum qilishicha, ayol 6 mart kuni Interpol so‘roviga ko‘ra Polsha va Ukraina o‘rtasidagi temiryo‘l kesishmasida ushlangan. Qo‘lga olingan ayol 2020 yil noyabrdan beri qidiruvda bo‘lgan.

Qozog‘iston maxsus xizmatlari versiyasiga ko‘ra, ayol 2017 yildan 2019 yilga qadar jinoiy faoliyat bilan shug‘ullangan. Qozog‘iston, Armaniston, Ozarboyjon, Ukraina, Qirg‘iziston, Tojikiston, O‘zbekiston, shuningdek, Tailand fuqarolari uning qurboni bo‘lgan.

Prokuratura so‘roq qilib bo‘lganidan keyin okrug sudiga ayolni ekstraditsiya qilish uchun yetti sutkaga hibsga olish bo‘yicha iltimosnoma kiritgan.

Eslatib o‘tamiz, 2023 yilda Pokistonda badavlat mijozlarga transplantatsiya qilish uchun odamlarning buyragini noqonuniy ravishda kesib olgan shifokor boshchiligidagi sakkiz kishidan iborat jinoiy guruh hibsga olingan edi.