Bosh prokuraturada jinoyatchilikning oldini olish masalasida idoralararo yig‘ilish bo‘lib o‘tdi

12 mart kuni Bosh prokuraturada jinoyatchilik va huquqbuzarliklarning oldini olish chora-tadbirlariga bag‘ishlangan respublika idoralararo yig‘ilishi bo‘lib o‘tdi. Unda parlament va hukumat a’zolari, sohaga mas’ul vazirlik va idoralar rahbarlari, shuningdek viloyat, tuman-shahar hokimlari va ishchi guruh a’zolari qatnashgan.

Bosh prokuratura matbuot xizmatining ma’lum qilishicha, yig‘ilishda mahallalarda xavfsiz muhitni yaratish va huquqbuzarliklarning oldini olishga doir prezident qarori ijrosi, yo‘l qo‘yilgan xato va kamchiliklar ko‘rib chiqildi. Shuningdek, Shavkat Mirziyoyev tomonidan korrupsiyaga qarshi kurashish mavzusidagi yig‘ilishda berilgan topshiriqlar ijrosi muhokama qilindi.

«Tanqidiy ruhda o‘tkazilgan yig‘ilishda jinoyatchilik va huquqbuzarliklarning oldini olishda yo‘l qo‘yilgan xato-kamchiliklar aniq raqamlar va misollarda ko‘rsatib o‘tilib, galdagi vazifalar belgilab olindi. Jumladan, namunali xavfsiz yo‘lak va ko‘chalarni tashkil etish, mahallalarni to‘liq videokuzatuv bilan qamrab olish, aholining huquqiy ongini oshirish, «mahalla yettiligi» tomonidan «ijtimoiy profilaktika» tamoyili asosida faoliyatni yanada jadallashtirish, har bir «qizil» va «sariq» toifali mahallalar bo‘yicha manzilli chora-tadbirlar ishlab chiqish bo‘yicha mas’ullarga aniq topshiriqlar berildi», deyiladi xabarda.

Shuningdek, tadbirda hududlar hamda respublika idora va vazirliklarining rahbarlari, mas’ul xodimlari tushuntirish va axborotlari eshitildi.

Respublika idoralararo yig‘ilishi yakunida mavjud kamchiliklarni bartaraf etish va muhokama qilingan sohalarda faoliyat samaradorligini oshirishga qaratilgan qaror qabul qilindi.