Tramp «Ozodlik radiosi» va «Amerika Ovozi» radiosini nazorat qiluvchi agentlikni qisqartirmoqchi

AQSh prezidenti Donald Tramp byurokratiyaga qarshi kurash bahonasida bir qancha agentliklarning funksiyalari va xodimlari sonini imkon qadar qisqartiradigan yangi qonunni imzoladi. Tegishli hujjat Oq uy tomonidan e’lon qilindi.

Ular orasida «Ozodlik radiosi» va «Amerika Ovozi» radiosini nazorat qiluvchi AQSh hukumatining Global Media agentligi (USAGM) bor.

Bundan tashqari, ro‘yxatga Vudro Vilson markazi, Federal vositachilik va kelishuv xizmati, Muzey va kutubxona xizmatlari instituti (AQSh muzeylari va kutubxonalarni qo‘llab-quvvatlaydi), Uysizlar bo‘yicha idoralararo kengash, Moliyaviy rivojlanish institutlari jamg‘armasi, Ozchiliklar biznesini rivojlantirish agentligi va Arktika tadqiqot komissiyasi kiritildi.

Qonunga ko‘ra, tashkilotlar bir hafta ichida o‘z filiallari vazifalari to‘g‘risida hisobot taqdim etishi kerak bo‘ladi.

Fevral oyida AQSh hukumati samaradorligi agentligi (DOGE) rahbari, amerikalik tadbirkor Ilon Mask «Ozodlik radiosi» va «Amerika Ovozi» radiosini yopishga chaqirib, ularda «o‘zi bilan gaplashadigan radikal so‘l ahmoqlar» ishlayotganini aytdi.

Avvalroq Donald Tramp Associated Press (AP) jurnalistlarini Oq uyda o‘tkaziladigan mabuot tadbirlariga kirishini taqiqlab qo‘ygan edi. Agentlik o‘z xabarlarida Meksika ko‘rfazini Amerika ko‘rfazi deb nomlashdan bosh tortdi. Tramp o‘z qaroriga ko‘ra, ushbu geografik nomni o‘zgartirgan edi. AP agentligi Oq uydan chetlatilishi haqidagi qaror yuzasidan sudga murojaat qildi, ammo hozircha muvaffaqiyat qozona olmadi.