Sud Trampga XVIII asrdagi qonun yordamida migrantlarni deportatsiya qilishni taqiqladi

Donald Tramp noqonuniy migrantlarni ommaviy deportatsiya qilish uchun kengroq vakolat olish maqsadida 1798 yilgi dushman davlat fuqarolariga oid qonundan foydalanishga urindi. Ammo oradan bir necha soat o‘tib, Federal sud XVIII asrga tegishli qonundan foydalanishni taqiqladi.

Ushbu qonundan AQSh tarixida faqat uch marotaba foydalanilgan: 1812 yili Buyuk Britaniya bilan urushda, Birinchi va Ikkinchi jahon urushlarida. Oq uy bayonotida keltirilishicha, mazkur qonundan qayta foydalanish zarurati «Tren-de-Aragua» jinoiy guruhining AQShdagi noqonuniy harakatlari sabab yuzaga kelgan.

AQSh okrug sudyasi Jyeyms Boasberg Trampning farmonini bloklab, venesuelalik migrantlar deportatsiyasini 14 kunga to‘xtatib qo‘ydi. Qaror shu kunning o‘zida Amerika Fuqarolik erkinliklari himoyasi ittifoqi hamda «Olg‘a demokratirya» tashkiloti tomonidan kiritilgan da’voga javoban qabul qilingan.

«Sudga bugun ertalab ma’lum bo‘lgan favqulodda vaziyatni hisobga olgan holda ushbu ish bo‘yicha eshituvlar belgilanmagunga qadar, zudlik bilan status-kvoni saqlab qolishni talab qilib, qaror chiqardim», — deyiladi sudya Boasbergning qarorida.

Avvalroq Tramp ma’muriyati AQSh hududida noqonuniy yurgan chet el fuqarolari ro‘yxatdan o‘tishi va o‘zlarining shaxsiy ma’lumotlarini kiritishi kerak bo‘lgan portalni ishga tushirgandi. Ushbu talabga bo‘ysunmaganlar 5 ming dollargacha jarimaga tortiladi yoki 6 oy muddatgacha ozodlikdan mahrum etiladi.