YeI davlatlari Ukrainaga 40 mlrd yevrolik yordam paketi ajratishni kelisha olmadi

Yevropa diplomatiyasi rahbari Kaya Kallas YeIga a’zo davlatlar tashqi ishlar vazirlari Ukrainaga 40 milliard yevrolik yordam ko‘rsatish paketini kelisha olmaganini ma’lum qildi.

Bryusselda YeI kengashi yig‘ilishi yakunlari bo‘yicha o‘tkazilgan matbuot anjumanida Kaya Kallas ittifoq a’zolari yaqin vaqt ichida ushbu masalada oldinga siljishiga umid bildirdi.

«Ushbu tashabbus keng siyosiy qo‘llab-quvvatlovga ega», — dedi Kallas munozara tafsilotlarini muhokama qilish bosqichida ekanini ta’kidlab. «Yaqin vaqtlar ichida oldinga siljishimizga umid qilaman», — deya qo‘shimcha qilgan u.

Oldinroq OAVda 17 mart kuni YeI TIV rahbarlari Bryusselda Ukrainaga 40 milliard yevrogacha yordam ko‘rsatish masalasini muhokama qilishi to‘g‘risida xabarlar tarqalgan edi. Euractiv portalining yozishicha, uchrashuvda «Ukrainaga 2025 yilda kamida 20 milliard yevrolik, istiqbolda esa mamlakat ehtiyojidan kelib chiqib, 40 milliard yevrolik harbiy yordam ko‘rsatish» masalasining muhokamasi rejalashtirilgan.

Yangi transhni ajratish taklifini mart oyida YeI diplomatiyasi rahbari Kaya Kallas ilgari surgandi. U Ukrainaga 20 milliard yevrolik yordam ko‘rsatish tashabbusi bilan chiqqan edi. O‘shanda Vengriya ushbu tashabbusini bloklab qo‘ygan, shu bois Kallasning taklifi YeIning 6 mart kungi sammitining yakuniy bayonotiga kiritilmagan. Ma’lumotlarga ko‘ra, shundan keyin YeIda Ukrainaga harbiy yordam ko‘rsatish bo‘yicha fond tashkil etish taklifi berilgan.

Yevropadagi ayrim siyosatchilar Ukrainaga 2025 yilda yordam ko‘rsatish rejasiga o‘z e’tirozlarini bildirmoqda. Xususan, Slovakiya bosh vaziri Robert Fitso YeI sammitiga yo‘l olishdan oldin o‘z mamlakati Ukrainaga YeI davlatlari budjetidan mablag‘ ajratilishiga ovoz bermasligini ma’lum qilgan.